Euskadi eta Venezuelako futbol selekzioen artean gaurko partida hasi aurretik, Lehendakaria eta Hauteskunde Orokorretarako EAJ-PNVren hautagaiak ondoan izan dituela, EBBren presidenteak ziurtatu duenez “Madrilera joango gara kamiseta berdea jantzita, Euskadikoa, eta euskal zaletuak buruan, eta ez inoren laguntzaile gisa PP eta PSOEren arteko Klasikoan”
14Azaroak “Azaroaren 29an EAJ da Euskadirentzako eta Euskal Selekzioarentzako boto seguru bakarra”. Irmotasun horrekin agertu da Euzkadi Buru Batzarraren presidente Aitor Esteban gaur bertan Santimami futbol zelaian Euskadiko eta Venezuelako futbol selekzioen artean jokatu den partida hasi aurretik. Lehendakaria eta Arabatik, Bizkaitik eta Gipuzkoatik, Kongresu eta Senaturako aurkezten diren zerrendetako buruak eta Euskadi animatzera joan diren militante jeltzaleak ondoan izan dituela, Estebanek argi eta garbi adierazi duenez “Madrilera joango gara kamiseta berdea jantzita, Euskadikoa, eta euskal zaletuak buruan, eta ez inoren laguntzaile gisa PP eta PSOEren arteko Klasikoan. Azaroaren 29tik aurrera Euskadi eta bere interesak Madrilen ordezkatuta egotea nahi dugu, eta boto segurua, zure interesak ondo bermatuta egon daitezen klausula argiak dituen poliza, EAJ-PNVren aldeko botoa da”.
Maribel Vaquerok, EAJ-PNVk Gipuzkoatik Kongresurako aurkezten den hautagaiak bere aldetik azaldu du gaur egun denek Euskadiko elastikoa “harrotasunez janzten duten arren”, EAJ-PNVk baino ez du bere alde egin, bakarrik eta laguntzarik gabe defendatu baitu Kongresuan. 2022ko Kirolaren Legea "oso mugarri garrantzitsua izan zen", horri esker pilota eta surfeko Euskal Selekzioa ofizialak direlako eta "beste kirol batzuei ere atea ireki zitzaielako", eta hori jeltzaleek Espainiako Parlamentuan aurkeztutako zuzenketa bati esker baino ez zen posible izan, azaldu du. "Ahalegin handia izan zen, negoziazio gogorra egin behar izan genuen, PSOEren aurkako jarrera gainditzeko behar izan genuelako, eta haien gainean egon behar izan genuen, hitzartutakoa bete zezaten, baina azkenean lortu genuen", esan du Vaquerok pozik. Baina lan hori EAJk bakarrik egin zuela azaldu du, "Legearen bozketan Bildu abstenitu egin zelako, nahiz eta orain hala izan zela ezkutatzen ibili: Eurengatik izango balitz, pilotako Euskal Selekzioa paper bustia baino ez litzateke izango, eta futbolekoa ateak itxita dituen ametsa".
Voxen aurka ere hitz egin du Vaquerok, "lorpen horiek ezerezean utziko dituztela eta Euskal Selekzioa desegin egingo dutela agindu dutelako, eurek Espainiako ‘batasun nazionala' deitzen dutena indartzeko". Kongresuko bozeramaileak mezu argia bidali die: "Buruan ondo grabatu dezatela: ez dira igaroko". "Horregatik da garrantzitsua Madrilen taldea izatea eta eragiteko gaitasuna izatea. Euskal herritarroi harrotasuna ematen digun hori, elastiko hau, nork defendatuko duen jakin behar dugu", aldarrikatu du Gipuzkoako hautagaiak. “Guk egindakoak dakartzagu, ez promesak", amaitu du.
