EAJ-PNVk kezka agertu du alkatea legegintzaldia amaitu baino urtebete lehenago irakaskuntzara itzultzea prestatzen hasi delako
Jeltzaleen ustez, Markina-Xemeinek udalerrian ehuneko ehunean zentratuta dagoen alkatea behar du, eta erabaki honek udalaren antolaketan eta kudeaketan izango dituen ondorioei buruzko azalpenak eskatu ditu.
13Uztailak UztailaK 13 |
MARKINA-XEMEIN
EAJ-PNVk harridura eta kezka agertu ditu alkateak uztaileko Osoko Bilkuran egindako adierazpenen ostean. Izan ere, bertan iragarri zuen datorren irailetik aurrera irakaskuntzara lanaldi murriztuan itzultzeko asmoa duela, eta horren bidez, legegintzaldia amaitutakoan irakaskuntzara behin betiko itzultzea prestatu nahi duela.
Jeltzaleen iritziz, erabat zilegia da edozein pertsonak bere lanbide-ibilbideari buruzko erabakiak hartzea. Hala ere, alkateak emandako azalpenek zalantza handiak sortzen dituzte gaur egun dituen lehentasunen inguruan eta legegintzaldiaren azken txanpari aurre egiteko erakusten duen konpromiso politikoari dagokionez.
Alkateak berak azaldu zuenez, datorren ikasturtean irakaskuntzara itzulera progresiboa egitea da bere asmoa, 2027ko udal hauteskundeen ostean hezkuntzara behin betiko bueltatzea errazteko. EAJ-PNVrentzat zaila da ulertzea trantsizio hori prestatzen hastea oraindik legegintzaldia amaitzeko urtebete falta denean eta udalerriak aurretik erronka garrantzitsuak dituenean.
Osoko Bilkuran, EAJ-PNVren udal taldeak egoera horren aurrean duen kezka agertu zuen. Alkatearen lehentasunak Markina-Xemeinen dauden eta agintaldia amaitu arte udal kudeaketarekiko konpromiso osoari eutsiko ote dion galdetzen dute.
“Harrituta gaude alkatea irakaskuntzara itzultzea prestatzen hasi delako oraindik legegintzaldia amaitzeko urtebete falta denean. Gaur emandako azalpenen ondoren, zalantzak bere horretan dirau: non daude alkatearen lehentasunak, eta ea Markina-Xemein izango ote den bere lehentasuna agintaldia amaitu arte. Markina-Xemeingo herritarrek legegintzaldi osorako aukeratu zuten Udala gidatzeko, ez bere irteera hainbesteko aurrerapenez antolatzen hasteko”, adierazi dute EAJ-PNVtik.
Alderdi jeltzalearen ustez, kontraesankorra da, halaber, alkatetza irakaskuntzarekin bateratzeko lanaldi murrizketa iragartzea eta, aldi berean, dedikazioa osoa izango dela esatea. EAJ-PNVren iritziz, herritarrek argi jakitea merezi dute egoera honek zer eragin izango duen udalaren eguneroko jardunean, udal proiektuen jarraipenean eta tokiko gobernuaren erantzuteko gaitasunean.
EAJ-PNVk gogorarazi du gai hau joan den ekaineko Osoko Bilkuran eztabaidagai bihurtu zela lehen aldiz, bere bozeramaile Luis Egurrolak egindako galderaren ondorioz; ordura arte, alkateak ez baitzion Udalbatzari udal antolakuntzarako hain garrantzitsua zen erabaki horren berri eman. Orduan bertan iragarri zuen alkateak uztaileko Osoko Bilkuran emango zituela gai horri buruzko azalpenak.
Alderdi jeltzalearen iritziz, ostegun honetan emandako azalpenek ez dituzte argitu planteatutako zalantzak, eta herritarrek argi eta garbi jakin behar dute erabaki horrek nola eragingo dion Udalaren funtzionamenduari, eta zer berme dauden Markina-Xemeinek udal kudeaketan erabat zentratutako alkatea izango duela legealdia amaitu arte.
“Markina-Xemeinek udalerriko arazo, proiektu eta aukeretan erabat zentratuta dagoen alkatea behar du. Goizez, arratsaldez eta gauez. Gobernatzeak konpromisoa, dedikazioa eta lidergoa eskatzen ditu legegintzaldiaren azken egunera arte. Herritarrekiko arduragatik, EH Bilduk gardentasunez azaldu behar du erabaki honek zer eragin izango duen udal kudeaketan eta zer berme eskaintzen dituen markinarrek merezi duten dedikazio mailari eusteko”, gogoratu dute EAJ-PNVtik.
