EAJ-PNVk Jon Gorka Elgezabal Fano aukeratu du Laukizko alkategai, 2019an hasitako proiektuari jarraipena emateko
Alderdi jeltzaleak udalerriari buruz duen ezagutza, Laukizekiko duen konpromisoa eta azpiegiturak hobetzeko, tokiko bizitza dinamizatzeko eta herritarren bizi-kalitatea indartzeko egindako lana azpimarratu ditu.
02Ekainak EkainaK 02 |
LAUKIZ
Laukizko EAJ-PNVk Jon Gorka Elgezabal Fano aukeratu du 2027ko udal hauteskundeetarako alkategai. Alkatea 2019tik, Elgezabal Fano izango da jeltzaleen zerrendaburua, azken urteetan garatutako proiektuari jarraipena emateko eta udalerria hobetzen jarraitzeko.
Alderdi jeltzaleak urte hauetan Udalaren buru izan den esperientziari garrantzia eman dio, baita hurbiltasunean, talde-lanean eta Laukizko bizilagunen beharrizanekiko konpromisoan oinarritutako proiektu baten buru izateko duen gaitasunari ere.
Laukizen jaioa eta hazia, Elgezabal Fanok bere ibilbide pertsonal, sozial eta profesional osoa egin du udalerriari lotuta. Bere lan instituzionalaz gain, harreman estua du elkarte-bizitzarekin eta tokiko tradizioekin, eta aktiboki parte hartzen du herri-kulturarekin eta herri kirolekin lotutako jardueretan, sokatiran edo idi probetan, esaterako.
EAJ-PNVk azpimarratu du urte hauetan Udalak hainbat ekimen bultzatu dituela udal azpiegiturak modernizatzeko, zerbitzu publikoak hobetzeko eta herritarren bizi-kalitatea indartzeko. Era berean, udalerriko dinamizazio sozial eta kulturala izan da udal-ekintzaren lehentasunetako bat, adin guztietako pertsonei zuzendutako kultura-, kirol-, aisialdi- eta bizi-ohitura osasungarriak sustatuz.
Bestalde, Jon Gorka Elgezabal Fanok berarengan jarritako konfiantza eskertu du, eta adierazi du “Laukizek aurrerapauso handiak eman dituela urte hauetan, auzokideekin, elkarteekin eta herriko eragileekin batera egindako lanari esker. Bide luzea dugu egiteko eta erronka berriak ditugu egiteko, baina gure lan egiteko modua beti gidatu duten hurbiltasunari, entzuteari eta konpromisoari eutsiz egingo dugu”.
