Europa Globaleko Funtseko arrantza-jardueretarako "finantzaketa nahikoa" eskatu du EAJ-PNVk

Europar Batasunak  arrantzarekin eta akuikulturarekin lotutako jardueretarako "finantzaketa nahikoa" bermatu behar du Europa Funts Globalaren esparruan, hori delarik EBren kanpo-jarduera finantzatzeko tresna. Hala, arrantzarekin lotutako beste kanpo-ekintza batzuk osatu beharko lituzke, hala nola arrantza jasangarriko lankidetza-akordioak. Horixe da Oihane Agirregoitia EAJ-PNVko eurodiputatuak Europako Parlamentuko Arrantza Batzordeak Global Europe programari buruz emandako iritzi-irizpenaren aurkezpenean  gaur defendatu duen argudioetako bat.

"Finantzaketa nahikorik gabe, ezin da ondo funtzionatuko duen arrantza-politikarik egon. Europar Batasunak arrantzaren garrantzia indartu behar du Urte Anitzeko Finantza Esparruan. Aurrekontu berrian Europako arrantza- eta akuikultura-sektorea ezin da bigarren mailako zeregin bihurtu. Zuzkidura egokia behar da, ozeanoen kudeaketari dagokionez  izan behar dugun anbizioaren mailan egongo dena. Europako arrantza sektoreak bere alde egingo duen Europa bat merezi du", defendatu du Agirregoitiak.

Txostenak ildo beretik azpimarratzen du arrantzak eta akuikulturak enplegua eta aberastasuna sortzen dituztela, aldi berean elikadura-subiranotasuna bermatuz. "Gure ustez, ingurumen-kontu huts batera murriztea akats estrategikoa litzateke, lehiakortasuna eta hazkundea indartzen ere laguntzen duten jarduerak direlako. Beraz, funts berriak bere dimentsio ekonomikoa aitortu behar du, bai eta Europako operadoreentzat zein hirugarren herrialdeentzat benetako aukerak sortzeko  duen gaitasuna ere, itsas sektoreen lehiakortasuna babestuz eta lehia hobea eta bidezkoagoa sortuz, lehia-baldintza bidezkoagoekin", gaineratu du.

Eurodiputatu jeltzalearen iritziz, Europa Global programa berriak  lagundu beharko luke nazioarteko ordena eta ozeanoen gobernantza indartzen, legez kanpoko eta arautu gabeko arrantzarekiko "zero tolerantzia" defendatuz, arrantzarako baldintza bidezkoagoak eta lankidetza eta koordinazio handiagoa sustatuz. "Hirugarren herrialdeekiko akordioak eta elkarlana holistikoki eraiki behar dira, bi aldeentzako emaitza sendoak eta iraunkorrak bermatzeko”, amaitu du.

Txostena aurkezteaz gain, Europako Parlamentuko arrantza batzordeak gaur bertan, asteazkenarekin, baimena eman die euskal flotarentzat erabat garrantzitsuak diren bi arrantza-hitzarmeni. Lehenengoak aldeko 21 boto eta kontrako 6 jaso ditu, eta Cook Uharteekin sinatutako akordioaren protokoloari buruzkoa da. Zazpi urteko iraupena izango du, eta urtean 40 egunez inguraketa-ontzietako lau atunontziri arrantza egiteko aukera emango die, urteko 460.000 euroko finantza-ekarpenaren truke, bai arrantza-baliabideak eskuratzeko, bai tokiko arrantza-politika garatzen laguntzeko. "Garrantzitsua da,  eta ez bakarrik aukera emango duelako gure ontziek arrantzatzen jarrai dezaten. Funtsezkoa ere bada elkarte estrategikoak indartzea eta inguruan loturak izatea, Txina bezalako beste herrialde batzuen eragina indargabetzen laguntzeko", argudiatu du Agirregoitia eurodiputatu eta txostengileak.

Arrantza-batzordeak abalatutako bigarren akordioa, aldeko 23 botorekin, kontrako 3rekin eta abstentzio 1ekin, Santo Tomé eta Princekiko arrantza-protokolo berriari buruzkoa da. Horri esker, 26 atunontzik (Espainiako Estatuko 15ek eta Frantziako 11k) eta azalerako 9 tretzarik (Espainiako Estatuko 7k eta Portugalgo 9k) urtean 6.500 tona hegalabur eta beste espezie migratzaile harrapatuko dituzte urtean 825.000 euroko finantza-ekarpenaren truke. Milioi erdi ekarpen horretatik, arrantzaren kudeaketa iraunkorra, kontrol- eta gainbegiratze-gaitasunak, artisau-arrantza eta Santo Tomé eta Principe tokiko arrantza-komunitateak babestuko dituzte.

Europako Parlamentuko Arrantza batzordearen bileran, ordezkariek baieztatu dute ostegunean komisarioen elkargoak laguntza sorta berri bat onartuko duela, Iranekin izandako gatazkaren eta Ormuzeko itsasartearen itxieraren ondorioz merkatuan eragin diren distortsioei aurre egiteko, erregaiaren prezioaren igoeragatik. Laguntza horiek atzeraeraginezkoak izango dira, otsailaren 28tik aurrera aplikatuko dira, eta krisian dauden sektoreetara zuzenduko dira, hala nola arrantzara eta itsas garraiora. Arrantza-jardueraren kasuan, Arrantza eta Akuikulturako Europako Funtsaren 26.2 artikulua aktibatuko da,  kasu horietarako krisi-mekanismo aplikagarria baita.