EAJ-PNV: “Ordiziak ezin du blokeatuta jarraitu. EH Bilduren ezintasunaren aurrean, herria martxan jartzeko ardura geure gain hartu dugu”
Joseba Aranburuk akordioa sustatu du udalerriko paralisiari amaiera emateko eta Majori, hiri-antolamendu berria eta ekipamendu estrategikoak martxan jartzeko.
12Martxoak MartxoaK 12 |
ORDIZIA
Ordiziako EAJ-PNVren bozeramaile Joseba Aranburuk adierazi du aurrekontuak aurrera ateratzeko eta udalerriarentzat ibilbide-orria estrategiko bat ezartzeko lortutako akordioak behar garrantzitsu bati erantzuten diola: legegintzaldi honetan EH Bilduk Ordizia baldintzatu duen blokeo instituzionalari eta paralisi politikoari amaiera ematea.
Aranbururen hitzetan, “Ordiziak denbora gehiegi zeraman blokeo egoera batean murgilduta. Udalerri batek ezin du aurrera egin gobernatzen duenak egunez egun proiekturik, norabiderik eta kudeatzeko gaitasunik erakusten ez badu”.
Bozeramaile jeltzalea bereziki kritikoa izan da gobernu-taldearen kudeaketarekin. “EH Bilduk argi utzi du ez duela Ordizia gobernatzeko gaitasunik. Udalerriaren etorkizunerako proiektu berriak bultzatzeko gai ez izateaz gain, abian edo bideratuta zeuden ekimenei jarraipena ematen ere ez du jakin. Proiektu estrategikoak geldirik utzi dituzte herria geldialdian geratzen zen bitartean”.
Aranburuk ohartarazi du Ordizia inguruko udalerriekin alderatuta posizioa galtzen ari dela. “Inguruko herriek proiektuekin, plangintzarekin eta anbizioarekin aurrera egiten duten bitartean, Ordiziak atzean geratzeko arriskua du egungo udal gobernuaren lidergo politiko faltagatik”.
Testuinguru horretan, EAJ-PNVk lidergoa hartzea erabaki du. “EH Bilduk udalerria gidatzeko agerian utzi duen ezintasunaren aurrean, EAJ-PNVk egoera desblokeatzeko ardura hartu behar izan du. Ezin genuen onartu Ordiziak geldirik jarraitzea”.
Aranbururen ustez, udal politika ezin da urgentziei erantzutera edo inprobisatzera mugatu. “Herri bat gobernatzeak ikuspegi estrategikoa, plangintza eta anbizioa eskatzen ditu. Politika ezin da epe laburrari begira soilik egin. Ordiziak etorkizunerako proiektu bat eta norabide argia behar ditu”.
Lortutako akordioak udalerriaren etorkizuna markatuko duten hiru erronka estrategiko nagusiri heltzen hasteko aukera ematen du.
Lehenengoa Majori kiroldegiaren eta kirol azpiegitura multzoaren berritzea eta berrantolaketa da; ekipamenduak modernizatzeko ezinbesteko esku-hartzea, urte askotan zain egon ondoren.
Bigarren erronka biztanleriaren zahartzeari lotutako zerbitzu eta ekipamenduen plangintza bultzatzea da; zehazki, San Jose egoitzaren eta haren ingurunearen irisgarritasuna hobetzea, erabaki ausartak eta epe luzerako plangintza behar dituen lehentasuna.
Hirugarren ardatz estrategikoa Hiri Antolamenduko Plan Orokor berria (HAPO) abian jartzea da; tresna funtsezkoa Ordiziaren etorkizuneko garapenerako; etxebizitza, irisgarritasuna edo espazio publikoa definitzeko; eta datozen hamarkadetarako udalerri-eredua zehaztuko duena. Nabarmentzekoak dira Herri Antzokiaren berritzea, Altamirako igogailuari emango zaion bultzada eta kaleak asfaltatzeko zein landa-bideak mantentzeko 200.000 euroko urte anitzeko partida.
“Ordiziak lidergoa, plangintza eta anbizio politikoa behar du. Orain arte falta izan den guztia”, adierazi du Aranburuk.
Bozeramaile jeltzaleak gobernu-taldeari egindako kritika zuzen batekin amaitu du: “EH Bildu erabat galduta eta noraezean dago. Aldiz, EAJ-PNVn argi dugu Ordiziak zer behar duen eta nola kudeatu behar den bere etorkizuna. Horregatik erabaki dugu aurrera pausoa eman eta herria martxan jartzea”.
