La Sirenako aterpetxea harrera eta gizarteratze zentro bihurtu da

Udal Gobernuak La Sirena udal aterpetxea harrera eta gizarteratze zentro bihurtzeko erabakia hartu du. Azken asteotan izandako hustuketek eragindako bizitegi-larrialdiari aurre egiteko hartu da neurria, pertsona asko egoera bereziki zaurgarrian geratu baitira.

Joan den abenduan, La Sirenako aterpetxeak 50 pertsona hartu zituen behin-behinean, Martuteneko Agustinos eraikina hustu ondoren. Hasieran erantzun koiunturala izan zen eta martxora arte iraungo zuen. Hala ere, hiriaren errealitate sozialak eta Herrerako bigarren hustuketa batek agerian utzi dute harrera- eta gizarteratze-baliabideak indartzeko beharra. Horregatik guztiagatik, La Sirenak zerbitzu hori ematen jarraituko du, aterpe gisa funtzionatzeari utziko dio eta modu egonkorrean Udal honetako Gizarte Zerbitzuen karteraren zentro bihurtuko da.

Baliabide hori indartzean, halaber, laguntza ematen zaie une zail batean daudenei Aukerak programaren baitan egonkortasuna berreskuratzeko, prestakuntza jasotzeko, enplegagarritasuna hobetzeko eta bizitza autonomo baterantz aurrera egiteko. Erabakiak hiria zaindu eta babesteko apustua sendotzen du, inor atzean gera ez dadin.

Mariaje Idoeta Gizarte Zerbitzuetako eta Gizarte Ekintzako zinegotziak azaldu duenez, "Donostiak bizitegi-bazterkeriari arreta emateko sarea indartu du azken urteotan, eta gaur egun 234 ostatu-plaza ditu urte osoan zehar, gehi beste 100 plaza neguan. Gainera, egunero 276 otordu eta gizarteratzeko hainbat baliabide eskaintzen ditu, 12 milioi baino gehiagoko aurrekontuarekin, baina gure lurraldera iristen diren etxerik gabeko pertsonen kopuruaren hazkunde esponentzialak dauden baliabideak gainditzen ditu, eta, gainera, Donostiako asistentzia-presioa handitu egin da, Gipuzkoa osoan ez baita garatu Gipuzkoako prestazio eta zerbitzuei buruzko 185/2015 Zorroaren Dekretuan jasotako zerbitzuen eta prestazioen zorroa".

Idoetak argi utzi du Aukerak programak aterperik gabeko pertsonak barne hartzeko ibilbide bat eskaintzen duela, "irizpide bikoitz batekin: humanismoa eta exijentzia. Eskubideak eta betebeharrak".