"Egin beharrekoa egiteko" eskatu dio Vaquerok Sanchezi, segurtasuna bermatzeko eta tren sistemarekiko konfiantza berreskuratzeko

"Gure taldeak ez du katastrofista izan nahi, eta ez du Estatuko trenbide-sarearen kolapsoaz hitz egiten; baina gai hau unean uneko gorabeheretatik harago dago, akats tekniko saihestezinetatik edo nahita anplifikatutako kasu bakar batetik harago", adierazi du Maribel Vaquero Euskal Taldearen bozeramaileak, Pedro Sanchezek Adamuzen eta Rodalien azken istripuen eta trenbide-zerbitzuaren egungo egoeraren berri emateko Kongresuan egin duen agerraldian.

Vaquerok gogorarazi duenez, "gaur egun tren gehiago dabiltza, maiztasunak, erabiltzaileak eta zerbitzuak ugaritu egin dira", eta inguruabar horiek "gorabehera gehiago" ere eragin ditzakete, are gehiago "mantentze-lan nahikorik gabeko sare batean". Baina, Gobernuak "inoiz baino gehiago inbertitzen" ari dela esan arren, Vaquerok zehaztu du "trenbideak ez duela huts egiten inbertsio faltagatik bakarrik; prebentziozko mantentzeak, plangintza txarrak eta protokolo operatiboek garrantzi handia dute".

Hala, Adamuzen eta Gelidan gertatutakoa ezagutzeaz gain (CIAFen behin betiko ondorioak espero dira horri buruz), Gobernuari eskatu dio zerbait egin dezala: "Erantzukizun politikoa onartzeak erabaki inpopularrak hartzea ere badakar, hala nola bonuen eta deskontuen politika aldatzea partida horiek azpiegituren mantentzera bideratzeko, bai eta lehentasunak berrantolatzea eta emaitzak eskatzea ere, garraio publikoa ezin baita merkealdiei eta beherapenei buruzko iragarkietara mugatu". Eta Sánchezi gogoratu dio orain bere eginkizuna "bidaiarien segurtasuna bermatzea eta trenbideko garraioan konfiantza berreskuratzea" dela, "unibertsitateko ikasle eta langile askok beren eguneroko bizitzarako behar baitute. Egin beharrekoa egin ezazu, iraganeko gobernuei begiratu gabe.

Vaquerok eskatu du azaltzea "zer egingo duten, zenbat denboran eta zer hobekuntzarekin", "egutegi eta konpromisorik gabeko kontakizuna propaganda hutsa delako". Eta sarea mantentzeko are aurrekontu handiagoa eskatu duen arren, zehaztu du "garrantzitsuena ez dela onartzen den aurrekontua, azkenean gauzatzen dena baizik. Eta horretarako, aurrekontua igotzea bezain garrantzitsua da Ministerioak plantilla handitzea eta borondate politiko handiagoa erakustea". Era berean, gogora ekarri du ez dituztela azpiegituraren gainerako beste puntuak ahaztu behar, orain Adamuzen eta Gelidan baitaude zentratuta, mantentze-lanak bertan pilatuz". Begiak, aurrekontua eta jendea sareko puntu guztietan jarrita eduki behar dituzu, etengabe"

Horri lotuta berretsi du abiadura handia Euskadira iristeko eta Europako hiriburuekin lotzeko EAJ-PNVk hitzemanda daukan konpromisoa. “Hori bai da lehentasun ekonomiko eta soziala gure lurraldearentzat, bai eta trenbide-sistemaren modernizazioa bultzatzeko aukera ere; beste batzuentzat, berriz, konfrontaziorako arrazoia baino ez da".

Nazioarteko politikaz hitz egiteko agerraldia

Gobernuak nazioarteko hainbat forotan erakutsi duen jarrerari dagokionez, Vaquerok adierazi du ez zela beharrezkoa Sanchezek Dubain iragartzea beren asmoa dela 16 urtetik beherakoei sare sozialetarako sarbidea mugatzea; izan ere, eztabaida garrantzitsua da hori, eta Ganberan eztabaidatu behar da adingabeak babesteko Lege Organikoaren Proiektua izapidetzen den bitartean.

Era berean adierazi du Europar Batasunean mugak externalizatu izanak eragiten dion kezka , "beste urrats bat ematen delako asiloa eskatzen duten pertsonak EBtik kanpoko herrialdeetara kanporatzea ahalbidetuz, nahiz eta lurraldearekin inolako loturarik ez izan". "Europak bere burua defendatzen du babesa bilatzen duenarengandik, eta ez du behar bezain irmo jokatzen bere existentzia mehatxatzen duenaren aurka".