Arratiako EAJ-PNVk Lemoako Udaleko gobernu taldearen kudeaketa defendatu du Agarreko okupen kasuan
Alderdi jeltzaleak dei egiten die Arratian ordezkaritza instituzionala duten alderdi politikoei —zehazki EH Bilduri— horrelako egoerei irtenbide integrala emateko eta baliabide berriak sortzeko Bestalde, gizarte-larrialdietarako partidak eta Arratiako Mankomunitateari egin beharreko ekarpena handitzea proposatuko du, Gizarte Zerbitzuei buruzko Legean aurreikusitako laguntza-bitartekoak indartu daitezen
04Otsailak OtsailaK 04 |
LEMOA
Arratiako EAJ-PNVk Lemoako Udaleko EAJ-PNVko Gobernu taldeak Cementos Lemonaren jabetzako Agarre etxebizitzen interbentzioan egindako kudeaketa defendatu eta babestu du. Talde lemoarrak hasieratik bideratu du lan hori, bazterkeria-egoeran dauden pertsonekiko arreta-eredu hurbilago baterantz aurrera egiteko konpromiso irmoarekin.
“Hasiera-hasieratik, udalak behar bezala jokatu zuen: pertsonen segurtasuna lehenetsi zuen, elektrizitate- eta sute-arrisku larria zegoela ohartarazten zuen abisu tekniko bat jaso ondoren". Arrisku horrek, Arratiako EAJ-PNVtik gogorarazi dutenez, "gaur egun jarraitzen du, eta, beraz, Udalaren interbentzioa behar-beharrezkoa izan da, eta hala izaten jarraitzen du".
Alderdi jeltzaleak, halaber, erakunde arteko egituraren lana azpimarratu du, aste hauetan zehar familien eta eraginpeko eraikinak okupatzen dituzten pertsonen bizileku-, gizarte- eta osasun-premiei erantzuteko aukera eman baitu. Bestalde, Lemoako Udalari “bere betebeharra azken asteetan egin duen bezala garatzen jarraitzeko” eskatu dio, eta azaldu du “gezurra dela Udalak kalean erregistratuta zeuden pertsonak utzi izana. Guztiei aukera bat eskaini zaie”.
Arratiako EAJ-PNVk Arratieko Sare Antirrazistaren kritikei muzin egin die, eta “gertakariekin bat ez datorren kontakizun bat elikatzeari uzteko" eskatu dio. Horrelako krisi batek batu eta lagundu egin behar du, ez konfrontaziorako eta politika egiteko espazio bihurtu”. Gainera, “gauzatzen ari den interbentzioak irizpide tekniko eta sozialei erantzuten die, baita egoera horiek ondo ezagutzen dituzten erakunde eta entitateen arteko koordinazioari ere. Arduratsuena lan egiten uztea eta nahasmen gehiago ez sortzea da”.
Erantzukizun politikoa: baliabide eta benetako irtenbide gehiago
“Arratian ordezkaritza duten alderdi guztiei —eta bereziki EH Bilduri— dei egin nahi diegu, guztion artean, bakarrik desagertuko ez diren arazoei erantzun sendoagoak bilatzeko gai izan gaitezen”.
Ildo horretan, Arratiako EAJ-PNVk adierazi du "larrialdi sozialera bideratutako partidak indartzea eta Arratiako Mankomunitateari egindako ekarpena hobetzea" proposatuko duela, “Gizarte Zerbitzuen Legean aurreikusitako baliabideak indartzeko helburuarekin”.
Gainera, "dagoeneko egoera ahulean daudenak aipatzen dituzten diskurtsoetan ez erortzeko eskatzen diegu bizilagunei. Ez da bidezkoa, eta ez dio bizikidetzari laguntzen, errua nora joan ez dutenei edo aukera baten bila kanpotik datozenei leporatzea ", argitu dute jeltzaleek.
Lemoak gauzak egiteko beste modu bat dagoela erakusten du
Azkenik, Arratiako EAJ-PNVk azpimarratu duenez, "Lemoan erabilitako ereduak ez du zerikusirik beste udalerri batzuetan jarraitutakoarekin. Tolosan etorkinak behin baino gehiagotan irtenarazi dituzte erantzun integralik eman gabe, eta Lemoak zorroztasun juridiko, tekniko eta sozialarekin lan egin du, birkokatzeko eta hezkuntza-laguntzarako alternatibak eskainiz ". Zentzu horretan, azaldu duenez, "hori da bidea: arduraz, bermeekin eta, batez ere, pertsonengan pentsatuz jokatzea".
