Loiolako kuartelak gaurtik aurrera Donostiako Udalaren jabetzakoak izatea ospatu du Euskal Taldeak
Maribel Vaquero Kongresuko bozeramaile jeltzaleak txalotu egin du azkenean lursail horien salerosketa sinatu izana, Euskal Taldeak Kongresuan aurrekontuen negoziaketan lortu zuen akordio baten ondorioz. Hala, 1.700 etxebizitza babestu berri eraikiko dira Gipuzkoako hiriburuan
23Uztailak UztailaK 23 |
Kongresua
“Hauxe bai da politikagintza probetxugarria. 17 hektareako lursaila, orain arte praktika militarrerako erabili izan dena, Donostiaren etorkizunaren parte bat izango da, auzo berri bat eraikiko baita bertan, donostiarrentzako 1700 etxebizitza babestu berrirekin. Hala lan egiten dugu EAJn, Madrilen egunero lantzen ditugun negoziaketetan euskal hiritargoarentzako konponbideak bilatuz”. Hitz hauekin ospatu du bozeramaile jeltzale Maribel Vaquerok Loiolako kuartelak kokatuta egon diren orubeak Donostiako Udalari eskualdatzeko agiria izenpetu izana. Ekitaldiko protagonista izan dira Eneko Goia alkatea eta María Ángeles Cano, INVIED, Defentsa Ministerioaren Etxebizitza, Azpiegitura eta Ekipamendu Institutuaren zuzendari gerentea.
INVIEDen eta Donostiako Udalaren arteko salerosketa-egintza izan da Euskal Taldeak eta Espainiako Gobernuak 2021eko Estatuko Aurrekontu Orokorren negoziazioan lortutako itunaren ondorio. Itun haren bidez, Donostiako Udalak Defentsa Ministerioarekin akordio bat lortzea erraztu zen, 17,5 hektareako partzela 73 milioi euroko kopuruan besterentzeko.
Ekimen honen bidez eta Euskal Taldeak euskal erakundeekin garatu ohi duen elkarlanaren ondorioz, orain arte herritarrentzat debekatuta egon den espazio berri bat izango du Donostiak bere herritarrei etxebizitza babestuak eskaintzeko, eta, gainera, Loiola eta Txominenea inguruan dituen auzoetako bizilagunen bizitza hobetzea ahalbidetuko du, lotura hobeekin eta etorkizuneko zerbitzu berriekin.
