Oihane Agirregoitiak gidabaimena kentzeari buruzko akordioa bultzatu du, EBko errepideak seguruagoak izan daitezen

Oihane Agirregoitia EAJ-PNVko eurodiputatuak gaur, asteartearekin, Renew Europe taldeko txostengile gisa, EBn gidatzeko eskubidea kentzeari buruzko zuzentaraua berrikusteari buruzko behin-behineko akordio bat ixtea lortu du. Akordio horrek, indarrean jartzen denean, bermatu egingo du trafiko-arauak modu larrian hausten dituztenak erantzule izango direla EB osoan, arau-haustea edozein tokitan egien dela.

Europako Parlamentuak eta EBko Poloniako Presidentetzak adostu dute arau hau, Kontseiluaren izenean, gidatzerakoan eman daitekeen zigorgabetasunari planto egiteko eta Europako errepideetan heriotza kopurua murrizteko. Akordioa ordu batzuk lehenago gidabaimenei buruz behin-behinean adostutako zuzentarauaren berrikuspenari gehitu zaio. Bi arau horiek EBko bide-segurtasuna hobetzeko arau-sorta baten parte dira.

Gaur egun, gidari batek baimena eman duen herrialdeaz bestelako herrialde batean trafikoko arau-hauste bat egiten badu, zehapena arau-hauste hori egin den herrialdean baino ezin da aplikatu. Arau berriekin, berriz,gidabaimena kentzea baimena eman duen herrialdeari ere helarazi beharko zaio, erabakia EB osoan aplika dadin.

"Sei hamarkada igaro dira lehen saiakerak egin zirenetik, eta, beraz, urrats izugarria da gure errepideetan istripu hilgarriak murrizteko, seguruago egiteko eta gidatzean zigorgabetasunaren aurka borrokatzeko", balioetsi du eurodiputatu jeltzaleak, Europako Parlamentuaren eta Kontseiluaren artean hiruren arteko lehen negoziazioa amaitu ondoren.

Arau berriak gehiegizko abiaduragatik, istripu hilgarriengatik eta alkoholaren edo drogen eraginpean gidatzeagatik egindako arau-hausteei aplikatuko zaizkie, eta estatu kideek gidabaimenak kentzeari buruz hartutako erabakien berri eman beharko diote elkarri, aipatutako arau-hausteekin zerikusia badute. Gainera, eragindako gidariei zehapenaren berri eman beharko diete 20 laneguneko epean.