EH Bilduk eta Sumarrek, PPren botoak baliatuz, Euskal Taldearen Lurzoruaren Legearen erreforma ezeztatu dute
Maribel Vaquero diputatu jeltzaleak deitoratu du ez zaiola erantzunik eman udal erakundeek egin duten aldarrikapenari Hiri Antolamenduko Plan Orokorrei segurtasun juridikoa emateko eta etxebizitza gehiago eraiki ahal izateko
EH Bilduk, PPk eta Sumarrek euren botoak batu dituzte gaur arratsaldean Kongresuan, Lurzoruaren Legearen testua aldatzen duen Euskal Taldearen Lege Proposamena atzera botatzeko. Ekimena Maribel Vaquero diputatu jeltzaleak defendatu du, eta Lurzoruaren Legearen 55. artikulua erreformatzea eta udal erakundeen eskaerari erantzutea zuen helburu, Hiri Antolamenduko Plan Orokorrak bertan behera gera ez daitezen zuzendu daitezkeen akatsak direla eta.
Vaquerok azaldu duenez, Euskal Taldearen Lege Proposamen honen helburua zen "udalek beren etxebizitza-politikak garatu ahal izatea, akats formal edo prozedura bat konpondu ahal izateko eta urte askotako lana deuseztatu ez dadin". Vaquerok azaldu duenez, "kolore politiko guztietako" ehun bat udalerriren Hiri Antolamenduko Plan Orokorrak baliogabetu dira, eta "euskal udalek, batez beste, zortzi urte behar dituzte" beren hirigintza-planak aurrera eramateko, "forma-akats horiengatik bertan behera gera daitezkeelarik". "Ezin da ekintza eza salatu eta aukera dagoenean, ez jardun", esan die Legebiltzarreko taldeei.
Vaquerok azpimarratu du EAJ-PNVk proposamenak dituela etxebizitza gabeziari aurre egiteko: etxebizitza hutsak merkaturatzeko laguntzak ematea, etxebizitza planak martxan jartzea, alokatzeko orduan segurtasun juridikoa bermatzea, abalak gazteek etxebizitzak erosteko, fiskalitatearen bidezko laguntzak eta etxebizitza berrien eraikuntza. "EAJk proposamenak jartzen ditu mahai gainean, egingarriak diren neurri zehatzak", azpimarratu du diputatu jeltzaleak. "Herritarren alde lanean jarraituko dugu", esan du Vaquerok.
