“Nork defendatuko du PP eta Vox suntsitzera etorriko direna, hori guztia eraiki duenak baino hobeto, hau da, EAJ-PNVk?”, ohartarazi du PP eta Voxen gehiengo baten aurrean
10Azaroak Datorren azaroaren 29ko hauteskundeak erabakigarriak dira Euskadirentzat. “Euskal hauteskundeak dira, zoritxarrez gaur egun gure egunerokoan eragina duten hainbat gai Madrilen erabakitzen direlako”, adierazi du Joseba Díez Antxustegi Eusko Legebiltzarreko EAJ-PNVren bozeramaileak Onda Vascan egindako elkarrizketa batean. Azpimarratu duenez, euskal herritarrak Madrilen nork ordezkatuko dituen eta zer herri-eredu defendatuko den dago jokoan.
“Ez da gauza bera Euskadi Madrilen batzuek ordezkatzea edo beste batzuek ordezkatzea”, adierazi du. Ildo horretan, Díez Antxustegik EAJ-PNVk azken legegintzaldian Kongresuan egindako lana aldarrikatu du. Azaldu duenez, 350 diputatuetatik bost baino ez izan arren, eragin handia izan dute Sanchezen Gobernuaren politikak moderatzeko eta erdigunera ekartzeko, baita euskal gizartearen interesak defendatzeko ere. “Errepikapen-delituak egiten dituztenen aurkako zigorrak gogortzeko lege bat onartu dugu; dekretuek, familia zaurgarriak babesteaz gain, etxebizitza-jabe txikiak ere babes zitzaten eragin dugu; eta gure industria defendatzeko akordio garrantzitsuak lortu ditugu”.
Díez Antxustegik inkestek iragartzen duten egoerari ere egin dio erreferentzia, PPk eta Voxek gehiengo osoa lor dezaketela aurreikusten baitute. Ildo horretan, ohartarazi du ezaugarri horiek dituen gobernu batek “gure erakundeei, gure ongizate-sistemari, Kontzertu Ekonomikoari eta gure autogobernuari eraso egitera etorriko litzatekeela”. Aukera horren aurrean, EAJ-PNVk Euskadiren defentsan historikoki bete duen zeregina aldarrikatu du. “Nork defendatuko du guk daukaguna, hori eraikitzen, altxatzen, diseinatzen eta defendatzen aritu den Euzko Alderdi Jeltzalea baino hobeto?”.
EBBko burukideak, aldi berean, azpimarratu du euskal ongizatea ezin dela ziurtzat jo, eta defendatu beharreko arloen artean aipatu ditu pentsioak, soldatak, enplegua, industria eta zerbitzu publikoak. Era berean, Madrilen euskal talde indartsu bat mantentzearen garrantzia nabarmendu du, Euskadin eragina duten erabakietan eragiteko gaitasuna izango duena. “Ongizate hori ezin dugu ziurtzat jo; ongizate hori jokoan dago”, amaitu du.
