Venezuelako presidentea karguaz jabetuko delarik, Euzkadi Buru Batzarrak argitara eman nahi duen komunikatua

2024ko uztailaren 28an Venezuelak Presidentetzarako azken hauteskundeak egin zituen. Goizalde hartan bertan, Hauteskunde Kontseilu Nazionalak Nicolás Maduro izendatu zuen garaile, botoen % 51,2arekin eta Edmundo Gonzalez Urrutia oposiziogileak jaso zuen botoen %44,2ko emaitzarekin. Hala ere, oraindik ez dira aurkeztu garaipen hori egiaztatzeko zenbaketa-aktak.

Aitzitik, oposizioak digitalizatutako aktak jaso ahal izan zituen, guztien %80 baino gehiagori zegozkienak. Horien arabera %67 ziren Edmundo González Urrutiaren aldekoak eta %30 Nicolás Maduroren aldekoak. Kopuru horiek atzeraezin bihurtzen dute azken emaitza hori.

Venezuelako hauteskundeetara joan ahal izan ziren begirale fidagarriak oso gutxi izan arren, aurreko paragrafoan esandakoari eutsi diote. Hala, Nazio Batuen Adituen Lantaldeak zein Carter Zentroko ordezkariek lehen momentuan adierazi zuten hauteskundeetan ez zirela bete hauteskunde sinesgarriak egiteko behar diren integrazio- eta gardentasun-neurriak. Era berean egiaztatu zuten hautesleen erregistroaren eguneratzeak eta, batez ere, atzerriko erroldan izena emateko orduan eman ziren oztopoek jende askori botoa ematea eragotzi ziotela. Azkenik, salatu egin zuten Hauteskunde Kontseilu Nazionalak ez zituela argitaratu ahoz eman zituen emaitzak babestuko zituzten datuak.

Jarraian, Nicolás Maduro Venezuelako Auzitegi Gorenera joan zen eta bere garaipena egiaztatzea erreklamatu zuen, zeina prozedura sumario baten bidez eman baitzitzaion.

Ordutik aurrera, gero eta sarriago eman dira oposizioko pertsonen kontrako jazarpenak, atxiloketak, erailketak eta espetxeratzeak, azken hilabeteotan 2.500tik gora izanik.

2025eko urtarrilaren 10ean, Venezuelako hurrengo presidenteak karguaz jabetu beharko du 2025-2031 legegintzaldirako. Egoera politiko delikatu honen aurrean, Euzkadi Buru Batzarrak ondorengo adierazpenak egiten ditu:

• Venezuelak eta venezuelar herri osoak demokrazia merezi dute eta Zuzenbidezko Estatuan bizitzeko eskubidea dute, beren krisiak gainditu ahal izateko eta bake, elkarbizitza eta oparotasunezko etorkizuna izateko.

• 2024ko uztailaren 28ko hauteskundeetan herriak adierazi zuen borondatea errespetatu behar da. Ildo beretik, errealitate demokratikoak erakusten du Venezuelako herriaren gehiengoaren borondateak erabaki zuela hurrengo presidentea Edmundo González Urrutia izatea, eta Venezuelako hauteskunde-legeen arabera, 2025eko urtarrilaren 10ean karguaz jabetu behar duela.

• Venezuelan Giza Eskubideak defendatzea eskatzen dugu, behin eta berriz urratuak izan baitira Nazio Batuen Erakundeak eman dituen txostenetan jasotzen diren ondorioen arabera.

• Errepresio politikoari amaiera ematea exijitzen dugu, bai eta Herrialde horretako espetxeetan legearen kontra atxilotuta jarraitzen duten preso politikoak berehala askatzea ere.

• Venezuelako indar politiko guztien artean elkarrizketa eta negoziaketa eman behar direla aldarrikatzen dugu, trantsizio politiko inklusiboari bide emango diona, bakea, adiskidetzea eta batasuna, demokraziaren defentsa, askatasuna eta Venezuelan Zuzenbide Estatua lortzera begira, Nazioarteko Komunitatearen tutoretza, babes eta laguntzarekin.