EAJ-PNVk positibotzat jo du Kataluniaren finantziazio berezirako akordio politikoa
María Jesús Montero presidenteordeak Senatuan egindako agerraldian, María Dolores Etxanok berau Euskadiko Itun Ekonomikoarekin eta Nafarroako Hitzarmenarekin ez alderatzea eskatu du, eta defendatuko dituztela adierazi du, ondorio negatiborik izango balute
Senatuko Euskal Talde Parlamentarioak positibotzat jo du PSOEk eta ERCk Kataluniarako finantzaketa berezia izateko lortutako akordioa, autogobernuan sakontzeko, kudeaketarako autonomia handiagoa izateko eta eremu fiskal propioa izateko. María Jesús Montero Gobernuko lehen presidenteorde eta Ogasun ministroak goi-ganberan egindako agerraldian, María Dolores Etxanok adierazi du beharrezkoa dela "denbora ematea akordioa garatu, sakondu eta zehaztu dadin; unea iritsitakoan, guztiok eztabaidatu eta iritzia eman ahal izango dugu akordioari buruz, hura gauzatzeak bertan aurreikusitako lege-aldaketak ekarriko baititu".
Hala, Etxanok azpimarratu du Kataluniarako formulak bere ibilbide propioa izango duela eta bere finantziazio sistema propioa ezarriko duela. "Ez da EAEko Itun Ekonomikoa, ezta Nafarroako Hitzarmena ere, eta ondo legoke horiek ez alderatzea", eskatu du, biek Konstituzioaren Lehen Xedapen Gehigarrian, Euskal Autonomia Estatutuan eta Nafarroako Hobekuntzan duten ainguratzea aipatuz. "Ez dut uste Katalunian lortutako akordioak beste sistemen kritika ezta alderaketarik ekarri behar duenik, izan ere haien autogobernuan eta autonomia fiskalean sakontzeko finantzaketa-sistema propioa bilatzen dute". Hala, jakinarazi duenez, "EAEko eta Nafarroako finantzaketa-sistemei buruzko akordioen eraginez ondorio negatiboak egongo balira, ez izan zalantzarik, ohi bezala, EAEko eta Nafarroako erakundeek, eta Euskadiko eta Nafarroako alderdi gehienek, gure lurraldeetan errotuta dauden sistemak defendatuko dituztela".
Bestalde, senatari jeltzaleak deitoratu du Alderdi Popularraren helburua, agerraldia eskatzean, autonomia erkidegoen finantziazioa "arma alderdikoi gisa" erabiltzea izan dela, "laido faltsuen inguruan polemikak piztuz", lurraldeen arteko liskarrak sortzen saiatuz, "eta adostutakoa indarrean dauden beste sistema batzuekin alderatuz". Era berean, Montero presidenteordearen eta sozialisten eta ERCkoen beste ordezkari batzuen adierazpenek, "pedagogia eta gardentasun ariketa egin beharrean, nahasmena eta kezka sortzen lagundu dute", adierazi du. Azkenik, Etxanok nabarmendu duenez, Kataluniarako akordioaz harago, "ematen dituzten zerbitzuak finantzatzeko autonomia erkidegoek jasotzen dutenaren artean dauden ezberdintasunak murriztea beharrezkoa da".
