Iurretako EAJ-PNVk hauteskunde-programaren % 85 gauzatuta edo martxan du legegintzaldiaren azken zatian
Jeltzaleek oso balorazio positiboa egin dute legegintzaldian egindako lanaz, etxebizitzan, mugikortasunean eta zerbitzuetan proiektu garrantzitsuak bideratu eta auzoetako egunerokoa hobetzeko urratsak eman direlako.
11Urriak UrriaK 11 |
IURRETA
Legegintzaldiaren amaiera hurbiltzen ari den honetan, Iurretako EAJ-PNVk iurretarrekin hartutako konpromisoak jarduera zehatzetan gauzatu diren agintaldiaren balantzea egin du. Hauteskunde-programan jasotako 60 ekintzetatik 43 dagoeneko eginda daude eta beste 8 martxan; hau da, programaren % 85 beteta edo gauzatze-bidean dago.
Datuetatik harago, EAJ-PNVren ustez, balantzeak lan egiteko modu bat erakusten du: helburuak zehaztea, jarduerak planifikatzea eta Iurretaren etorkizunerako garrantzitsuak diren proiektuetan aurrera egitea, eguneroko beharrei erantzuteari utzi gabe.
Programan lehentasunezkotzat jotako jarduera guztiak eginda edo bideratuta daude. Horien artean daude Bidebarrietaren eraberritzea, etxebizitza berrien garapena, HAPOaren garapenean emandako urratsak, mugikortasunaren eta TaxiAuzune zerbitzuaren hobekuntza, trantsizio energetikoa eta gazteei zuzendutako zerbitzuen indartzea.
Iurreta datozen urteetarako prestatzen
Etxebizitza izan da legegintzaldi honetako lan-ildo nagusietako bat. Elizosten 80 etxebizitza garatzeak eta Bideondo eta ZAGA eremuetan aurrera egiteko egindako lanak babes ofizialeko eta prezio tasatuko etxebizitzen eskaintza handitzea ahalbidetuko dute, herritarrei etxebizitza eskuratzeko aukera berriak eskainiz. Horrekin batera, beste hainbat neurri ere landu dira: hutsik dauden etxebizitzak alokairura bideratzea, Elixaldeko udal-lokalak alokairuko zuzkidura-bizitoki bihurtzea edota baserrietan etxebizitzak egiteko aukerak aztertzea.
Iurreta udalerri irisgarriagoa eta hobeto konektatua izan dadin ere lan egin da, oinezkoentzako guneak hobetzeko, auzoen arteko mugikortasuna indartzeko eta TaxiAuzune bezalako zerbitzuak hobetu eta sendotzeko jardueren bidez. Horri guztiari jasangarritasunaren, kulturaren, euskararen, merkataritzaren, zerbitzu publikoen eta pertsonen arretaren arloetan egindako lana gehitu behar zaio.
“Hauteskunde-programak zentzua du proposamenak ekintza zehatz bihurtzeko balio duenean. Iurretan aurrera egin dugu hartutako konpromiso gehienetan eta, batez ere, datozen urteetan herriarentzat garrantzitsuak izango diren hainbat proiektu bideratuta ditugu”, adierazi du Iurretako EAJ-PNVk.
Jeltzaleen ustez, orain arte egindako lana ez da helmuga bezala ulertu behar, Iurretak aurrean dituen erronkei heltzen jarraitzeko oinarria baizik. “Martxan dagoena amaitu behar dugu, eta Iurretaren etorkizunean eragin zuzena izango duten gaiei erantzuten jarraitu, bereziki etxebizitzari, mugikortasunari, zerbitzuei eta gure auzoen hobekuntzari dagokienez”, azpimarratu dute.
Iurretako EAJ-PNVren ustez, udal-politika herritarren beharrei erantzuteko eta erabaki horiek emaitza zehatzetan gauzatzeko gaitasunean islatzen da. Legegintzaldi honetan programaren % 85 beteta edo martxan egoteak orain arte egindako lana erakusten du, eta helburu berriekin etorkizunera begiratzeko oinarri sendoa eskaintzen du.
