Abanto Zierbenako EAJ-PNVk kirol-instalazioak hobetzeko konpromisoan aurrera darrai El Mortuero berrituta
Soropila eta argiztapena berritzeak jarraipena ematen dio legealdirako hartutako konpromisoari: udaleko kirol-guneak aztertzea, berritzea eta kluben zein herriko elkarteen beharretara egokitzea.
07Urriak UrriaK 07 |
ABANTO-ZIERBENA
Abanto Zierbenako EAJ-PNVk legealdi osoan garatzen ari den lan-ildoaren barruan kokatzen du El Mortuero futbol-zelaian aurreikusitako berritzea. Helburua da udaleko kirol-instalazioak pixkanaka hobetzen jarraitzea eta erabiltzaileen beharretara egokitzea.
EAJ-PNVk gidatzen duen Abanto Zierbenako Udalak 300.000 euro bideratuko ditu lan horietara. Inbertsioari esker, futbol-zelaiko soropila osorik berrituko da eta argiztapen-sistema LED teknologiara egokituko da. Horrela, erabilera-baldintzak nabarmen hobetuko dira, herriko kirol-jarduerarekin eta, bereziki, Abanto Club SDk egiten duen lanarekin lotura estua duen instalazio batean.
EAJ-PNVren ustez, jarduketa honek legealdirako hartutako konpromisoetako bati erantzuten dio zuzenean: udaleko kirol-guneak eta eskaintzen diren jarduerak aztertzea, eta behar denean instalazioak berritzea edo gune berriak sortzea. Jeltzaleentzat, ez da ekintza puntual bat, lan egiteko modu bat baizik: dauden beharrak ezagutuz, elkarte eta klubekin hitz eginez eta ekipamendu publikoak etengabe eta modu planifikatuan hobetuz..
El Mortueroren kasuan, lan-ildo horrek jarraipen argia izan du. Udalak eta Abanto Club SDk aurrez lortutako akordioari esker, futbol-zelaia udalaren esku geratu zen, eta Udalak bere gain hartu zituen instalazioaren kudeaketa, mantentze-lanak eta hura zaindu eta hobetzeko beharrezko inbertsioak. Horri esker, klubak bere indarrak eta baliabideak kirol-jardueran, harrobian eta bere proiektuaren garapenean jar ditzake.
EAJ-PNVk azaldu duenez, orain aurreikusitako berritze-lanek orduan hartutako konpromisoan beste urrats bat ematea eta konpromiso hori instalazioaren gaineko jarduketa zehatzetan gauzatzea ekarriko dute.
“Gure kudeaketak hiru oinarri ditu: entzutea, beharrak aztertzea eta plangintzaz jardutea. El Mortueron bide hori egin dugu: lehenik, klubarekin batera lan egin genuen instalazioaren etorkizunari egonkortasuna emateko; ondoren, hura mantentzeko eta hobetzeko ardura hartu genuen. Orain abian jarriko den berritzeak lan egiteko modu horri berari erantzuten dio”, adierazi dute Abanto Zierbenako EAJ-PNVtik.
“Gobernatzea aurreratzea ere bada: daukaguna zaintzea eta zerbitzu zein instalazioak sortzen diren behar berrietara egokitzea. Horixe da legealdi honetarako hartu genuen konpromisoa, eta bide horretan lanean jarraitu nahi dugu”, gaineratu dute.
Abanto Zierbenako EAJ-PNVk, beraz, El Mortueron egingo den jarduketa udaleko ekipamenduak etengabe hobetzeko politikaren barruan kokatzen du. Entzutea, plangintza eta hobekuntza uztartzea da helburua, herriko elkarte eta kirol-eragileekin elkarlanean, udalerriak kirola egiteko instalazio egokiak izan ditzan eta klubek beren proiektuak baldintza egokietan garatu ahal izan ditzaten.
