EAJ-PNVk Kontzejuen Foru Arau berriaren onarpena Arabako herrien etorkizuna indartzeko urrats erabakigarritzat jo du
Jeltzaleek nabarmendu dute arau berriak, elkarrizketaren eta akordioaren ondorioz, autonomia, parte-hartze, gardentasun eta berme gehiago ematen dizkiela Arabako kontzejuei. Gaur goizean Arabako Batzar Nagusietan adostasun zabalarekin onartutako araudiak duela 30 urteko araudia modernizatzen du
10Uztailak UztailaK 10 |
Araba
AJ-PNVk oso positibotzat jo du Kontzejuen Foru Arau berria onartu izana. Erreforma hori "Arabarentzat aurrerapauso bat" da, eta kontzejuek gure herrien bizitzarako funtsezko erakunde gisa duten eginkizuna indartzea ahalbidetuko du.
Arau berriak 30 urte baino gehiagoz indarrean egon dena ordezkatzen du, eta Arabako erakundeen artean hilabeteetako lanaren, elkarrizketaren eta adostasunaren emaitza da. Eta gaur goizean aurrera atera da Batzar Nagusietan, kontzejuen funtzionamendua modernizatzeko eta egungo beharretara egokitzeko borondate partekatua agerian utziz. Bat ez beste talde guztien babesarekin lortutako babes zabalak erakusten du interes orokorra lehenesten denean posible dela adostasunak lortzea tokiko autogobernua hobetzeko eta gure herriak indartzeko.
EAJ-PNVren ustez, erreforma horrek autonomia handiagoa ematen die kontzejuei, eta herrietako egunerokotasuna eraginkortasun handiagoz kudeatzeko tresnak ematen dizkie. Gainera, gardentasunaren eta herritarren parte-hartzearen arloan aurrerapen garrantzitsuak egin dira, eta, horri esker, herritarrek zehatzago ezagutu ahal izango dute kudeaketa ekonomikoa, proposamenak egin ahal izango dituzte eta erabakiak hartzerakoan duten inplikazioa indartu ahal izango dute.
Foru Arau berriak gobernu ona eta segurtasun juridikoa sendotzen dituzten neurriak ere sartzen ditu, Gobernu Ona Behatzeko Organo bat sortuz, eta, aldi berean, kontzejuen kudeaketan pertsona berriak sartzea errazten du, aurkeztutako hautagai-zerrendetatik harago hautatzeko aukerak zabalduz eta kontzejuen erantzukizunak betetzen dituztenei ordainsaria jasotzeko eskubidea aitortuz.
“Herriaren alde lan egiteak ez du kostu pertsonal edo ekonomikorik ekarriko aurrera pauso bat ematea erabakitzen dutenentzat. Kontzeju sendoak, irekiak eta beren komunitateekin konprometitutako pertsona berriak erakartzeko gaitasuna dutenak behar ditugu", nabarmendu du EAJ-PNVk.
Jeltzaleen ustez, erreforma hau konpromiso argia da Arabako landa-ingurunearen etorkizunarekin eta herri biziak, parte-hartzaileak eta hurbilagoak, modernoagoak eta datozen hamarkadetako erronkei erantzuteko prestatuta dauden erakundeak mantentzearekin. "Kontzejuak – adierazi dutenez – Arabako indargune handienetako bat dira, eta beren erakunde-nortasunaren funtsezko pieza. Tresna gehiago, autonomia handiagoa eta kudeatzeko gaitasun handiagoa ematea herri bizien, etorkizuna izango duen landa-ingurunearen eta herritarrengandik hurbil dagoen gobernantza-ereduaren aldeko apustua egitea da.
Erreforma horren bidez, EAJ-PNVk berretsi egiten du berezko erakundeak indartzen dituen, akordioa tresna politiko gisa bultzatzen duen eta Arabako herri bakar bat ere atzean gera ez dadin lan egiten duen herri eredu batekiko konpromisoa.
