Oihane Agirregoitia: "Mexiko aliatu estrategikoa da, eta gure merkataritza-akordioa modernizatzeak aukera berriak sortuko ditu euskal enpresentzat"

"Mexiko nazioarteko aliatu estrategikoa da Europako enpresentzat eta euskal enpresentzat, eta gaur egun bizi dugun ziurgabetasun-egoeran, muga-zergen  etengabeko mehatxuarekin, garrantzitsua da konfiantzazko herrialdeekin aliantzak indartzen jarraitzea, joko- arau berberen arabera jarduteko prest egon daitezen. Espero dugu onartu dugun akordio global eguneratu horrek herrialde horretan dauden indarkeriak murrizten laguntzea, tokiko komunitateen eta indigenen eskubideak errespetatzea eta gure enpresei eta industriei akordioari ahalik eta etekin handiena ateratzen laguntzea", baloratu du eurodiputatu jeltzaleak Europako Parlamentuak maiatzaren 22an EBk eta Mexikok sinatu ondoren onartu zuen EB-Mexikoa Akordio Integrala modernizatzeari buruz.

Akordio modernizatuak egungo esparrua ordeztuko du, eta lankidetza politikoa eta merkataritza-harremana indartzen lagunduko du Latinoamerikako EBko bigarren merkataritza-bazkide handienarekin. Era berean, nekazaritzako elikagaien Europako esportazioak handitzea eta muga zergak ezabatzea ahalbidetuko du, Europako enpresei Mexikoko enkante publikoetan parte hartzea erraztuko die, aurrekaririk  ez duen sarbidea ahalbidetuz, eta klimaren eta lan-eskubideen babesa sustatuko du konpromiso lotesleekin. "Txinak mendekotasunak tresna geopolitiko gisa erabiltzen dituen mundu honetan, non AEBk gero eta fidagarritasun txikiagoa ematen baitu, gure norabide beretik doazen bazkideak behar ditugu, eta Mexiko horietako bat da", gaineratu du Agirregoitiak.

Europako Parlamentuaren kalkuluen arabera, akordioak onura gehigarriak ekarriko dizkie enpresa txikiei, estandarrak eta prozedurak sinplifikatuz, eta trantsizio berde eta digitaletarako funtsezko materialen hornidura seguruagoa bermatuko du. Anbizioz begiratuta, ondasunen eta zerbitzuen guztizko esportazioak % 75 handitu litezke, eta Europako enpresek, berriz, urtean 100 milioi euro aurreztu litzakete aduana-eskubideetan.

Beste merkataritza-akordio batzuen antzera, eguneratutako akordioak Europako nekazaritzako elikagai tradizionalen 568 adierazpen geografikoren babesa ere jasotzen du, hala nola Errioxako ardoarena, eta horrek legez kanpoko bihurtuko du Europako eskualdeetako elikagaien eta edarien imitazioak saltzea. Mexikok gaur egun inportatzen ditu Europako nekazaritzako elikagaiak, 2.500 milioi euroko balioarekin. Merkataritza-harreman berriak Europako esportazioetarako lekua hobetuko du, aduana-kostuak ia zerora murriztuko baitira. EUSTATen datuen arabera, 2025ean Mexiko izan zen EAEko esportazioen helmugako hamargarren herrialdea, eta lehena Latinoamerikan.

Onartu ondoren, Kontseiluak formalki amaitu ahal izango du akordioa, eta, ondoren, EBko estatu kide guztiek eta Mexikok berretsi beharko dute, erabat indarrean jarri baino lehen.