Lekeitiko EAJ-PNVk Udalaren arduragabekeria salatu du Garraitz uharterako sarbidean dauden arriskuen aurrean

Isuntza (Lekeitio) eta Karraspioko (Mendexa) hondartzen artean dagoen Garraitz irlarako sarbidea sobera ezaguna da herritarrentzat: itsasbeheran bakarrik egin daiteke oinez malekoian zehar, eta ezinbestekoa da itsasgorak estali eta irla isolatuta utzi aurretik itzultzea. Betidanik ezaguna den errealitatea da, eta ez du interpretaziorik onartzen.

Hala ere, Lekeitioko EAJ-PNVk salatzen duenez, azken urteetan arazoa ez da sarbidea bera, baizik eta EH Bilduk gobernatzen duen Udalaren “kudeaketa, aurreikuspen eta ardura falta”. Azken asteetan, egoera bereziki kezkagarriak bizi izan dira, lau egunetan 14 pertsona erreskatatu baitituzte, eta Gurutze Gorriaren txalupak eta Ertzaintzaren helikopteroak mobilizatu behar izan dira, besteak beste. “Oso gertakari larriak dira, ezin ditugunak normalizatu”, ohartarazi dute alderdi jeltzaletik.

EAJ-PNVk adierazi du Lekeitioko alkateak bere erantzukizuna saihestea erabaki duela, egoera turismoaren masifikazioari, sare sozialei edo bisitarien arduragabekeriari egotziz. Are gehiago, aitortu du ez dakiela zein den irtenbidea. “Adierazpen horiek agerian uzten dute lidergo eta kudeaketa gaitasun falta kezkagarria, euren eskumen zuzenekoa den arazo baten aurrean”, adierazi dute jeltzaleek.

Alderdiak “biktimismo eta eskapismo politikotzat“ jo du egoera eta EH Bilduren diskurtsoko kontraesanak azpimarratu ditu. Gogorarazi du alderdi honek berak, Lea Ibarreko gainerako udalekin, Lea Artibaiko Mankomunitatearekin eta Lea Artibai Fundazioarekin (denak EH Bilduk gobernatuak) batera, aktiboki bultzatzen dituela turismoa sustatzeko kanpainak sare sozialetan eta komunikabideetan. Zehazki, Lea ibaiak Munitibarretik Lekeitioraino egiten duen ibilbidea. Hori guztia Next Generation funtsetatik jasotako milioi bat euroko diru-laguntza europarrarekin finantzatu da, eta EAJ-PNVren kudeaketari esker lortutako dirulaguntza. “Ezin da turismoa alde batetik sustatu eta bestetik eskuak garbitu planifikazio faltak eta oinarrizko segurtasun neurriek eragindako arazoak sortzen direnean”, adierazi dute.

Lekeitioko EAJ-PNVk berriro gogoratu du Garraitz irlarako sarbidearen segurtasuna Lekeitioko Udalaren eskumen esklusiboa dela, eta bere betebeharra dela mareei, arriskuei eta sarbidearen aldi baterako izaerari buruzko informazio argi eta garbia ematea. Horren harira, ohartarazi du alkatea ezin dela koordinazio mahaien atzean ezkutatu, ezta ardurak saihestu ere, utzikeria nabarmena ezkutatzeko.

Era berean, alderdiak gogorarazi du aurreko legealdietan informazio-kartelak zeudela malekoiko sarbidean, eta mareen arriskuaz eta ordutegiaz argi ohartarazten zutela, baita irudien bidez ere. “Neurri xumeak, ekonomikoak eta eraginkorrak ziren, gaur egun azalpenik gabe desagertu direnak”, deitoratu dute, egungo gobernu taldearen ekimen falta aipatuz.

Horregatik guztiagatik, Lekeitioko EAJ-PNVk bere erantzukizunak bere gain hartzeko eta pertsonen segurtasuna bermatzeko beharrezko neurriak berehala hartzeko eskatzen dio Udalari. "Kudeatzeko ezintasunak eta aurreikuspenik ezak ezin dute pertsonen bizitzak arriskuan jartzen jarraitu", ondorioztatu dute.

Era berean, gogorarazi dute segurtasuna ez dela eztabaida ideologiko bat, ezta irudi kontu bat ere, “edozein erakunde publikoren oinarrizko betebeharra da. Eta Lekeition, EH Bildu akats larriak egiten ari da”.