Erramun Osa izango da EAJ-PNVren Garaiko alkategaia
Egungo alkateak berriz ere alkategai izango da, proiektu estrategikoak sustatu eta garaitarren bizi-kalitatea hobetzera bideratutako legealdi baten ostean.
27Martxoak MartxoaK 27 |
GARAI
Garaiko EAJ-PNVren Uri Buru Batzarrak aho batez hautatu du Erramun Osa 2027ko udal hauteskundeetarako alkategai gisa, azken bi legealdietan Udala gidatu duen pertsonarengan konfiantza berrituz.
Azken urteotan, Garai aurrerapauso garrantzitsuak ematen ari da, garaiztarrekiko konpromisoan eta erakundeen arteko lankidetzan oinarritutako lan egiteko moduari esker. Eredu horrek ahalbidetu du bestela gauzatzea zaila izango litzatekeen proiektu eta hobekuntzak bultzatzea. EAJ-PNVk azpimarratu duenez, “Osak gidatutako erakunde arteko lankidetza funtsezkoa izan da inbertsioak erakartzeko, zerbitzuak hobetzeko eta udalerriko benetako beharrei erantzuteko”.
Halaber, egungo alkatearen ibilbidea balioan jarri dute, nabarmenduz kudeaketa publikoaren inguruko ezagutza zabala duela, bai erakunde mailan bai udal mailan pilatutako esperientziari esker, eta bere konpromisoa “Garairekin eta belaunaldi guztientzat aukerak eskainiko dituen udalerri kohesionatuago baterantz aurrera egiteko”.
Biografia
Erramun Osa euskara irakaslea da, eta ibilbide profesional sendoa du euskararen eta euskal kulturaren sustapen eta biziberritzearekin lotuta. Bere ibilbidean zehar AEKn, Euskal Herriko Ikastolen Konfederazioan eta Eusko Jaurlaritzan jardun du. Gaur egun, Euskaltzaindian egiten du lan, non 2013tik euskaltzain urgazlea den, eta Euskal Idazleen Elkarteko zein Udako Euskal Unibertsitateko kide ere bada.
Udal arloan, 2015eko udal hauteskundeetan zinegotzi hautatu zuten, eta 2019an alkate kargua hartu zuen, ardura hori gaur egungo 2023-2027 legealdian ere betetzen jarraitzen duelarik.
Osak azaldu duenez, “legealdi honetan aurrerapen garrantzitsuak bultzatzen ari gara Garain, besteak beste herri-bideen konponketa, auzotaxiaren martxan jartzea, kirolgunea bezalako azpiegitura berrien sorrera edota elkarte eta gizarte-sareari emandako babesa indartzea. Horrez gain, ingurumenaren, irisgarritasunaren eta zerbitzuen arloan ere hainbat ekimen gauzatu dira, hein handi batean erakunde arteko lankidetzari esker”.
Era berean, gaineratu duenez, “etorkizunari begira, ildo berean lanean jarraituko dugu, funtsezko proiektuetan aurrera eginez, hala nola ur-horniduraren hobekuntzan, udal azpiegituren sendotzean eta gure ingurunea zein ondarea babestean, betiere talde-lanean eta garaiztarrekiko gertutasunean oinarrituta”.
