Trapagarango EAJ-PNVk deitoratu du udalerria oraindik ere kiroldegiko zerbitzu duinik gabe jarraitzea, egungo gobernu-taldearen ia hiru urteko kudeaketaren ondoren
Baldintza-agiririk gabe, instalazioak egoera kaskarrean daude eta langileak ziurgabetasunean jarraitzen dute, nahiz eta gobernu-taldeak aurrerapenak egingo direla behin eta berriz iragarri.
23Martxoak MartxoaK 23 |
TRAPAGARAN
Trapagarango EAJ-PNVko udal taldeak deitoratu du, gaur egun, oraindik ere, ez dagoela Udal kiroldegian eta igerilekuetan zerbitzu egokirik, PSE-EEren gobernu-taldearen gelditasunaren ondorioz. Izan ere, gobernu-taldeak oraindik ez ditu kudeaketa-kontratu berrirako baldintza-agiriak aurkeztu.
Jeltzaleek gogorarazi dute agintaldi osoa daramatela instalazio horien egoera normalizatzeko funtsezko urrats bat eskatzen: baldintza-agiriak behingoan idaztea eta aurkeztea. Hala ere, prozesuak blokeatuta jarraitzen du, gobernu-taldeak iragarpenak egiten jarraitu badu ere.
Halaber, EAJ-PNVk gogorarazi du 2024ko abenduan, duela bi urte baino gehiago, gobernu-taldeak iragarri zuela baldintza-agiriak batzordean aurkeztuko zituela. Horretarako, Udalak kanpoko enpresa bat kontratatu zuen, eta dagoeneko 20.000 eurotik gora ordaindu zaizkio. Hala eta guztiz ere, ez da aurrerapenik egon.
Izan ere, 2025eko ekainaren erdialdean igerilekuei dagozkien baldintza-agiriak erregistratu ziren; baina, gaur egun, oraindik ez dira batzordean aurkeztu, ezta izapidetzea abiatu ere.
Bien bitartean, instalazioak “zerbitzu degradatua” ari dira ematen, EAJ-PNVren aburuz, Trapagaranek merezi duen kalitatearen azpitik. Gainera, langileak etengabeko ziurgabetasunean daude, lan etorkizunari dagokionez.
Horrez gain, EAJ-PNVk gogoratu nahi du Miguel Ángel Gómez Viar alkateak, urtarrilaren 12an Tele7n egindako adierazpenetan, esan zuela baldintza-agiriak bi hilabetean prest egon zitezkeela. Hala ere, martxoaren 13ko ostiralean egindako azken batzordean gai hori ez zen eguneko gai-zerrendan ere sartu.
Egoera horren aurrean, EAJ-PNVk berriro eskatu du baldintza-agiriak berehala aurkeztea, izapidetzea abiarazi eta zerbitzuari egonkortasuna emateko. Halaber, prest agertu da dokumentua hobetzeko ekarpenak egiteko eta Trapagarango herritarrei kalitatezko zerbitzua bermatzeko.
“Trapagaranek ezin du onartu oinarrizko zerbitzu batean kalitatea galtzen jarraitzea, ezta bere langileak kudeaketa faltagatik ziurgabetasunean mantentzea”, amaitu dute.
