Gernika-Lumoko EAJ-PNVk proposatu du Pasilekuko ‘Jose Antonio Arana Martija’ liburutegiaren proiektua definitzeko prozesu parte-hartzaile bat abiatzea
Jeltzaleen ustez, udalerriarentzat estrategikoa den proiektu batek herritarren inplikazio zuzena izan behar du.
18Martxoak MartxoaK 18 |
GERNIKA-LUMO
Gernika-Lumoko EAJ-PNVk mozio bat aurkeztu du Pasilekuko udal liburutegi berriaren proiektuaren inguruan herritarrentzako prozesu parte-hartzaile bat abiarazteko. Talde jeltzaletik adierazten duenez, “helburua da herritarren ekarpenak jasotzea proiektua behin betiko garatu aurretik, haien iritzia garrantzitsua delako guretzat”.
Urtarrileko osoko bilkuran jada ikusi zen prozesu hori irekitzeko beharra, udalerriarentzat garrantzi bereziko proiektua delako. Ondoren, martxoan, EAJ-PNVk berriz ere gai hori mahai gainean jarri zuen Hirigintza Batzordean, baina oraindik ez da zehaztu nola bideratuko den herritarren parte-hartzea.
EAJ-PNVren ustez, “ezin da halako proiektu bat herritarrei bizkarra emanda garatu; aitzitik, gernikarren iritzia kontuan hartuta eraiki behar da”. Horregatik, aurkeztutako mozioaren bidez, talde jeltzaletik Udalari proposatzen diote prozesu parte-hartzaile ireki bat sustatzea, proiektua gauzatu aurretik etorkizuneko liburutegiaren diseinuari eta erabilerei buruzko proposamenak eta hausnarketak jasotzeko.
Era berean, prozesu hori Hirigintza Batzordean lantzea proposatzen dute, udaleko talde politiko guztien parte-hartzearekin, garapen partekatua eta adostua bermatzeko.
Gernika-Lumoko EAJ-PNVk azpimarratu du ‘Jose Antonio Arana Martija’ Pasilekuko liburutegia funtsezko azpiegitura izango dela udalerriarentzat eta, horregatik, “herritarren benetako beharrei erantzun behar diela eta espazio erabilgarri, dinamiko eta irekia bihurtu behar duela".
“Parte-hartzea ezin da izapide hutsa izan; tresna eraginkorra izan behar du proiektuak hobetzeko eta Gernika-Lumoren etorkizunari eragiten dioten erabakietan asmatzeko”, ondorioztatu dute jeltzaleek.
