Gordexolako EAJ-PNVk gidatutako erakunde arteko lanak Zubiete zubiaren ordezkapena desblokeatu du, hainbat urtez URAri egindako erreklamazioen ondoren
Proiektua Uraren Euskal Agentziak gauzatuko du 2 milioi euro inguruko inbertsioarekin, eta inguruneko segurtasuna hobetzea eta uholdeak izateko arriskua murriztea ahalbidetuko du.
12Martxoak MartxoaK 12 |
GORDEXOLA
EAJ-PNVk balioan jarri du Gobernu talde jeltzaleak egindako erakunde arteko lana, Zubieteko zubiaren ordezkapena desblokeatzea ahalbidetu duena. Udalak aspalditik eskatu duen jarduera da, eta La Calzada auzotik igarotzen den Herrerias ibaiaren inguruneko segurtasuna hobetzea ahalbidetuko du.
Alderdi jeltzaleak gogorarazi du Gordexolako Udalak aspaldidanik eskatzen zuela La Calzada auzoko puntu horretan esku hartzeko beharra, egungo zubiak ibaiaren ur-goraldietan sortzen dituen arazoak direla eta. “Eusko Jaurlaritzarekin eta URArekin EAJ-PNV buru duen Gobernu Taldearen egindako lanari eta temari esker, proiektu hau abian jartzea lortu dugu, ibaiaren hustubide-ahalmena hobetzeko eta uholde-arriskua murrizteko”.
Jarduketak egungo zubia eraistea eta ahalmen hidrauliko handiagoko azpiegitura berri bat eraikitzea aurreikusten du. Aurreikusitako inbertsioa 1,9 milioi euro ingurukoa da, eta Eusko Jaurlaritzak finantzatuko du URAren bidez.
EAJ-PNVtik azpimarratu dute proiektu honek udalerriaren eskaera historikoari erantzuten diola eta Gordexolaren beharrak erakunde eskudunei helarazteko Udalaren etengabeko lanaren emaitza dela. Ildo horretan, “administrazioen arteko lankidetzari esker, segurtasuna eta ingurunearen babesa hobetzeko beharrezko jarduera bat desblokeatu ahal izan da”, nabarmendu dute.
Horrela, talde jeltzaleak Gordexola aurrera egin dezan eta gordexolarren eskaerak udalerriko bizitza hobetuko duten benetako proiektuak izan daitezen lanean jarraitzeko konpromisoa berretsi du.
