Euskal eredua defendatzen du EAJ-PNVk etxebizitzaren erronkari erantzun “integrala” emateko, “laguntza eta eraikuntza gehiagorekin eta burokrazia gutxiagorekin”

EAJ-PNVk ekitaldi bat egin du gaur eta bertan adierazi du euskal erakundeak, alderdi jeltzalea buru dutela, erantzun "integrala" ematen ari zaizkiola etxebizitzaren erronkari, "irtenbide erreal eta zehatzekin" egin ere. Joseba Diez Antxustegi EBBko burukide eta Eusko Legebiltzarreko bozeramaileak, Maribel Vaquero Kongresuko Euskal Taldearen bozeramaileak, Elixabete Etxanobe Bizkaiko ahaldun nagusiak eta Xabier Txurruka Zarauzko alkateak etxebizitzaren erronkari buruzko mahai-inguru batean parte hartu dute Ziortza Álvarez EGIkideak gidatuta.

Ekitaldiari hasiera emanez Diez Antxustegik azpimarratu duenez, etxebizitzarena erronka "konplexua" da, eta “konponbidea gehiago eraikitzean soilik oinarritzen duten batzuei eta gehiago arautzeko beharra konponbide bakartzat daukaten beste batzuei entzun ondoren, erantzun integrala emateko aukera nagusi bat dago, sen onez sortutakoa". "Beharrezkoa da neurri-ekosistema bat, gazteei eta klase ertainei etxebizitza bat eskuratzea errazteko", esan du, eta ondoren azpimarratu du "bakoitzak izan beharko lukeela nola bizi nahi duen erabakitzeko aukera": "Ez dugu inor alokairuan bizitzea inposatuko, baldin eta eurek beren jabetzako etxean bizi nahi badute".

Era berean, gainerako parte-hartzaileei beren jardun-eremuetan gauzatzen ari diren politikak azaltzeko hitza eman aurretik, EBBko burukide eta Eusko Legebiltzarreko bozeramaileak aipatu nahi izan ditu EAJ-PNVren ekimenez Eusko Jaurlaritzatik eta Legebiltzarretik bideratzen ari diren politikak: Euskal Etxebizitzaren Lege berria, zeinak gehiago eta arinago eraikitzea ahalbidetuko baitu, etxebizitza erosteko Eusko Jaurlaritzak ematen dituen abalak eta alokatzeko bideratzen ari diren laguntzak.

Maribel Vaquero Kongresuko bozeramaileak hitza hartzeko txanda aprobetxatu nahi izan du EH Bilduk defendatu eta babestu zuen Etxebizitzaren Estatuko Legea kritikatzeko. "Lege horrek, euskal eskumenak inbaditzeaz gain, eskaintza murriztu du, eta lehia handiagoa sortu du etxebizitza bat aurkitu nahi duten pertsonen artean, prezioak etengabe igotzea eraginez". "Lege hau panazea bezala saldu zitzaigun, baina benetako eragina negatiboa izan da". Etxebizitza alokatzen duten jabe txikiei segurtasun juridikoa emateko beharra ere aldarrikatu du Vaquerok, Euskal Taldeak Espainiako Gobernuarekin berriki adostu duen bezala.

Bizkaiko ahaldun nagusi Elixabete Etxanobek fiskalitatea "tresna eraldatzaile" gisa balioetsi du, baita etxebizitzaren arloko politikak gauzatzeko ere, ohiko etxebizitza erosteagatiko kenkari fiskalaren adibide argiarekin, urtean gehienez 1.955 euroko mugarekin. Etxanobek azaldu duenez, iaz 254.000 pertsonak izan zuten Bizkaian etxebizitza erosteko edo alokatzeko pizgarriren bat. Nahiz eta beste indar politiko batzuek neurri horri uko egin, iaz PSErekin eta Podemos Euskadirekin batera Arabako, Bizkaiko eta Gipuzkoako Lurralde Historikoetarako onartutako zerga-esparru berritu eta harmonizatuari esker herritarrek etxebizitza erosteko pizgarriak izaten jarraitzen dute eta geroz eta kolektibo gehiagok lortu ditzakete laguntza hauek.

Zarauzko alkate Xabier Txurrukak bat egin du bere udalerrian bizi izan den etxebizitzaren arazoarekin, eta "aurreko gobernu taldeari egotzitako erabateko paralisitik abiatuta, Zarauzko etxebizitzaren merkatua aktibatzea lortu dugu", adierazi du. Txurrukak azaldu duenez, azken hamarkadan 1.000 etxebizitza sustatu dira udalerrian, tartean 33 lonjak gaituz. Etxebizitzen %53 jabetza-erregimenera bideratu dira, eta %47 alokairura. Horretarako, Txurrukak lankidetza publiko-pribatua nabarmendu du. "Funtsezkoa izan da udaleko talde teknikoa, Eusko Jaurlaritza, Etxebide, Visesa eta eragile pribatuak lerrokatzea", nabarmendu du.

Esteka honetan etxebizitzaren erronkari erantzuteko EAJ-PNVk martxan dituen neurriak ikus ditzakezu: https://www.eaj-pnv.eus/eu/etxebizitza/