Kongresuak onartu egin du Konstituzio Auzitegiaren Legea erreformatzeko Euskal Taldeak egindako proposamena izapidetzea
Mikel Legarda Euskal Taldeko diputatuak eskumen-arazoak Konstituzio Auzitegiak ebatzi behar dituela defendatu du
23Irailak IrailaK 23 |
Kongresua
Kongresuak bide eman dio, lehen aldiz, Euskal Taldeak proposatutako Konstituzio Auzitegiaren Lege Organikoa aldatzeko Lege Organikoaren proposamenari. Mikel Legarda diputatu jeltzaleak defendatu du ekimena Osoko Bilkuran, eta jurisdikzio arruntak eskumenen transferentziaren inguruko akordio politikoak blokeatzea saihestu nahi du, Konstituzio Auzitegiak auzi horiek ebazteko azken hitza izatea erraztuz.
"Erreforma honekin proposatzen dugu jurisdikzio arruntaren eta konstituzionalaren arteko osagarritasun eta subsidiariotasun harreman bat ezartzea, Transferentzien Batzorde Mistoen eta beste organo batzuen ohiko erabakietan, eskumen autonomikoen irismena zehazteko", adierazi du Legardak Osoko Bilkuran. Ekimenaren helburua, laburbilduz, "konpartimentu estankoak saihestea" da, eta "gaur egun eskubide eta askatasun publikoekin artikulatuta dagoen bezalako harreman eredu bat bultzatzea, lege edo lege indarra duten xedapen edo egintzekiko babes edo konstituzio kontrakotasuneko auzi bidez".
Aldez aurretik, Maribel Vaquero Euskal Taldearen bozeramaileak Kongresuan emandako prentsaurrekoan azaldu duenez, Konstituzio Auzitegiak, legeen konstituzionaltasuna kontrolatzeaz gain, funtzio bikoitza du: "Herritarren oinarrizko eskubideak bermatzea eta administrazioen eskumenen interpretatzaile gorena izatea. Lehen kapitulua ezin hobeto artikulatuta dago Estatuko sistema juridikoan, baina bigarren kasua ez dago beti bermatuta. Gaur egun, jurisdikzio arruntean, Auzitegi Gorenean barne, bere oinarrizko eskubideak defendatzen ez dituela uste duen herritar orok eska diezaioke babesa Konstituzio Auzitegiari, eta mekanismo hori existitzen da. Hala ere, eskumen arazo baten izapidea epaitegi edo auzitegi batean hasten bada, kasua Auzitegi Goreneraino irits daiteke, baina hor amaitzen da bere bidea. Ez dago Konstituzio Auzitegira jauzi egiteko pasabiderik".
"EAJn beti aldarrikatu dugu Auzitegi Konstituzional neutrala izateko beharra, eta borrokan jarraituko dugu hala izan dadin", aldarrikatu du Vaquerok, "baina bide horretan funtsezkoa iruditzen zaigu organo honek gai horiei erantzutea, herritarren mesedetan hartzen diren akordioak direlako".
Legardaren hitzetan, beraz, "Konstituzio Auzitegia Konstituzioaren interpretea dela ezartzea" bilatzen da. Horretarako, beharrezkoa da "hobeto bermatzea Konstituzioaren eta haren blokearen interpretazio batasuna eta Auzitegi Gorenak Konstituzioaren interprete goren gisa duen posizioa".
"Gaur eskatzen duguna Konstituzio Auzitegiaren Legea aldatzea da, eskumenen arloan jurisdikzio arruntetik Konstituzio Auzitegirako pasabide bat sortzeko: bai izapidearen hasieran, kasua jasotzen duen auzitegiak Konstituzio Auzitegiari gaiaren funtsari buruzko kontsulta bat egin ahal izateko, bai amaieran, Auzitegi Gorenak ebatzi ondoren, ados ez balego, Konstituzio Auzitegira jo ahal izateko", laburbildu du Vaquerok.
