“Eredugarritasuna eta gardentasuna” erreklamatu dizkio Vaquerok Sánchezi, Euskal Taldearen konfiantza izaten jarraitu nahi badu
Talde jeltzalearen bozeramaileak Espainiako gobernuko presidenteari adierazi dio kezka eragiten diola azken aldian ezagutu diren informazioen larritasunak, eta ohartarazi du Euskal Taldeak agintaldiko lehen egunetik eskatzen duen berbera eskatzen jarraitzen duela: garbitasuna Gobernu zentralaren jokabidean eta inbestidura akordioan jasotakoa betetzea
“Eredugarritasuna, gardentasuna eta inbestidura akordioan jasotakoa betetzea. Ez dugu ezer gehigarririk eskatuko, ezta halako gertakari larriekin salerosketarik egingo ere”. Hitz horiekin laburbildu du Euskal Taldeko bozeramaile Maribel Vaquerok Espainiako gobernuko presidenteari luzatu dion mezua gaur goizean, asteazkenarekin, Moncloan egin duten batzarrean.
“Gure kezka adierazi diot, ezagutu duguna larria delako”, azaldu du Vaquerok Moncloatik bueltan zain izan dituen hedabideetako profesionalen aurrean. Bozeramaile jeltzaleak gaineratu du Gobernuburuari adierazi diola Euskal Taldeak espero duela ezagutu diren informazioen aurrean “gardena izan dadila eta neurriak har ditzala”. Era berean esan du jeltzaleen aburuz Sánchez uztailaren 9a baino lehen Kongresura joan beharko litzatekeela azalpenak ematera; data hori baita Espainiako gobernuak eman duena, “hiritargoa oso kezkatuta dagoelako”.
“Orain arte eman diren azalpenak ez dira nahiko izan. Adi jarraituko dugu informazioa aldakorra delako eta Beheko Ganberara joaten denean zer gehiago esaten duen eta gertakariek zer bide hartzen duten ikusteko”, esan du Vaquerok, eta azpimarratu du gaurko bileran Sánchezek ez duela beste neurri gehigarririk planteatu. “Zuhurtasuna eta apaltasuna”, ezarri du bozeramaile jeltzaleak.
