Nerea Ahedok migrazio-fenomenoa kudeatzen duten administrazioen arteko topagunea eskatu dio Gobernu zentralari

Nerea Ahedok migrazio-fenomenoa kudeatu behar duten administrazioen arteko topagunea sortzeko eskatu dio Gizarte Segurantza, Gizarteratze eta Migrazioetako ministroari. EAJ-PNVko senatariak erakundeen arteko koordinaziorik eza kritikatu du, arazo "estruktural eta transbertsal" baten aurrean, izan ere, "koordinazioa eta lidergoa behar ditu eta zure ministerioari dagokio zeregin hori, eta denbora luzea darama mutu eta gor", esan dio Escrivari. Ordezkari jeltzaleak agerian utzi du Estatuak tresnak, estrategiak eta informazioa partekatzeko gune bat izan behar duela, "migrazio politikak maila instituzional guztiei eragiten dielako". Ministroa ados agertu da Ahedorekin, eta eskerrak eman dizkio interpelazioa aurkezteagatik, "betetzeko presioa egiten didalako", esan du.

Halaber, gaineratu du ez dela “onargarria” autonomia-erkidegoek ez ezagutzea Espainiako Gobernuak Atzerritarren Legearen aldaketei buruz edo asiloari buruzko jarraibideei buruz egiten dituen proposamenak, hirugarrenen eguneroko bizitzan eragina dutenak, "horiek baitira gero tokian bertan lan egiten dutenak". Ildo horretan, Maroko eta Ceuta arteko mugan sortutako egoera kritikoaren aurrean, "zopatxoak eskatu eta inprobisatzea" kritikatu du. Adabakiak baino ez dira jartzen, ez da administrazioekin gogoeta egiteko, lankidetzan aritzeko eta ezagutzeko topagune bat bilatzen".

Halaber, joan den astean milaka etorkin iritsi aurretik Ceutan zeuden 200 haur lurraldeetara banatzeko Gizarte Zerbitzuen Sektore Arteko Koordinazio Mahaiaren gaurko bilera ere "adabakitzat" jo du. "Estrategia partekatua behar da Europan, baita Estatuan ere", gaineratu du. Azkenik, Konferentzia sektoriala deitu ez izana gaitzetsi du Ahedok, eta ministroak atzerapen hori justifikatu du hauek Estatuan duten funtzionamendua errefusatzen duela esanez. "Gustatzen ez bazaizu, alda dezagun; ezin da izan administrazioek gogoeta egiteko, partekatzeko, elkarlanean aritzeko eta planifikatzeko topagunerik ez izatea", erantzun dio EAJ-PNVko senatariak.