Enpresak dira munduan zehar Gipuzkoak dituen enbaxadore onenak
Gipuzkoako enpresa eta erakunde misioak aurrera darrai Indian, Coimbatoren Orbinoxek duen faktoriara egindako bisita batekin; lantegi honetan 135 lagun ari dira lanean gaur egun
07Ekainak 2017 2017 EkainaK 07 |
Berria
Gipuzkoako enpresa eta erakunde misioak aurrera darrai Indian, Coimbatoren Orbinoxek duen faktoriara egindako bisitarekin. Tolosaldeko enpresa honek gaur egun 135 laguneko lan-taldea du Indiako hiri honetan. Indiako faktoria gillotina-balbula eta damper-en produkzioan espezializatua dago, bereziki Amerika eta Asiako merkatuetarako.
Ekonomia Sustapena, Landa Ingurunea eta Lurralde Orekako diputatu Ainhoa Aizpuru buru duela, Gipuzkoako ordezkariek lan bilera izan dute Orbinox Indiako zuzendariordearekin, K.P.R. Prasadekin. Orbinox Indiaren ekoizpen plantaz gain, bertatik bertara ezagutu dute DLT filialaren faktoria. Gipuzkoar enpresaren filial hau damperren produkzioan dago espezializatua.
Orbinox Tolosan sortu zen 1960ko hamarkadan eta gaur egun 11 herrialdetan presentzia du, horietako bat Indian. 2015-2016an 62 milioi lortu zituen salmentetan eta mundu osoan barreiatuta 500 langile ditu. Merkatu globalen eta berrikuntzaren aldeko apustuan oinarritzen du bere estrategia eta bere produktu nagusiena, hain zuzen ere, gillotina-balbulak dira.
“Enpresak dira munduan zehar ditugun enbaxadore onenak. Berrikuntzaren eta kalitatean oinarritutako produktuen bitartez, exijentzia eta konpetentzia handiko merkatuetan bidea egin dute, egindako bisita guztietan baieztatzen dugun moduan. Gure enpresek egiten dituzten apustuak babesten jarraitu behar dugu, baita nazioartetzean ere”, adierazi du Ainhoa Aizpuruk.
