Euskadiren eraikuntzan buru belarri arituko den gazteria aldarrikatzen du Estebanek "pankartaren atzean" geratzen direnen aurrean

Aitor Esteban Euzkadi Buru Batzarraren presidenteak gaur Mungian egin den EGI egunean aldarrikatu du gazte inplikatua, proposatzailea, Euskadi eraikitzen duena, “pankartaren atzean geratzen diren horien aurrean”, GKE eta Ernairi erreferentzia eginez. “Guk ez dugu seinalatzen, proposatu egiten dugu. Ez dugu zarata egiten, Euskadi eraikitzen dugu. Eta gure Aberria defendatzeko eta eraikitzeko, eguneroko lana behar da, eta ez pankarta baten atzean geratzea. Gu gara, gure Alderdia izan da, Herri hau eraikitzeko dena eman duena. Euskadi fidagarria izan dadin, ongizatea eta industria autogobernuaren eskutik bultzatuz, Europari begiratzen dion Herria. Eta helburu argi bat dugu: Herri gehiago izatea, Nazio gehiago”. Halaber, Estebanek mezu argia bidali nahi izan die gazte jeltzaleei: “Mezu argi batekin nator. Ez zarete belaunaldi galdu bat, batzuek esaten duten bezala. Aurrera egin nahi duen belaunaldia zarete. Ez zarete gure etorkizuna, gure oraina zarete. Zuen lekua hartu behar duzue gizartean eta baita ere gure Alderdian. Ez zarete ezeren zain geratu behar. Gure oraina eta etorkizuna erabaki behar duzue. Zuen unea ez da etorkizun urrunean hasiko. Zuen momentua hasi da!”.

Estebanek ildo beretik baloratu nahi izan du atzo bertan Moncloan Imanol Pradales Lehendakariaren eta Espainiako Gobernuko presidente Pedro Sánchezen artean izenpetutako akordioa: “Ezinezko zirudiena lortu dugu: Euskadik erabakitzeko gaitasuna izango du aireportuen kudeaketan. Albiste bikaina da”. Halaber, EBBren presidenteak azaldu duenez “Akordio zabala da, eta gai garrantzitsuetan dago zentratuta: gure gaitasun politikoak handitzen ditu, Gernikako Estatutua lortzeko urratsak emanez 7 eskumen berrirekin; horrez gain, akordioetan industria eta segurtasun neurriak sartzen dira, herritarren kezka nagusietako batzuk zailtasun-testuinguru honetan. Batzuek zarata besterik egiten ez duten bitartean, blokeatzen eta denari `ez´ esaten dioten bitartean, gu akordioetara iristen gara. Aurrera egiten dugu. Politika probetxugarrian gaude, horixe baita Herrigintza”, amaitu du.

Estebanekin batera, hitza hartu dute Asier Areitio, Ziortza Alvarez eta Gorka Zarate EGIkideek. Areitio Mungiako Udaleko zinegotziak ongietorria eman die gazte jeltzaleei eta Euskadiren alde lan egiteko eta konpromisoa hartzeko deia egin die. Alvarezek gogora ekarri ditu euskal erakundeek, EAJ-PNVren lidergopean, etxebizitza erostera zein alokatzera begira abian jarri dituzten neurriak, EH Bilduren politikekin alderatuz, gazteria bultzatzen baitute eskaintza murritza eta eskaintza zabala dakarren egoeran alokatzera, Esker Abertzaleak Madrilen babestu zuen Estatuko Etxebizitza Legearen. Amaitzeko, Zaratek nabarmendu du Euzko Gaztediko kide izatearen harrotasuna, eta abertzale  eta euskaltzale guztiak deitu ditu egunez egun Euskadi eraikitzeko lanera bideratutako proiektu politiko honekin bat egitera.