Oiartzungo EAJ-PNVk hezkuntza sistema publikoa indartzeko konpromisoa berretsi du, haurreskola sare publikoan ez sartzearen ostean

Oiartzungo EAJ-PNV udal taldeak bere kezka sakona adierazi du, Udalak urtarrilaren 30a baino lehen 0-2 ziklorako haurreskolen sare publikora atxikitzea eskatu ez zuela egiaztatu ondoren, nahiz eta Haurrezkuntza partzuergoak ezarritako epearen barruan atxikitzeko aukera egon.

EAJ-PNVk sare publikoan sartzeak udalerriko familientzako hezkuntza-zerbitzuaren egonkortasuna, bermeak eta segurtasun juridikoa indartzea ahalbidetuko zuela nabarmendu du. Hala ere, Udalak eskaera ez aurkeztea erabaki zuen, hain zuzen ere, haur hezkuntzako sistema publikoa sendotzeko diseinatuta dagoen aukera bati uko eginez. Janire Mitxelena Oiartzungo EAJ-PNVko bozeramailearen hitzetan: "Horrelako erabaki garrantzitsu bati buruzko azalpen politikorik eza bereziki kezkagarria da. Zerbitzu honen mende dauden familiek argitasuna eta ziurtasuna merezi dute beren lan eta familia bizitza antolatu ahal izateko, baina ikusi duguna ziurgabetasuna eta inprobisazioa da."

Mitxelenak erabaki hau udal hezkuntza sistemaren etorkizunari eragiten dioten beste batzuei gehitzen zaiela azpimarratu du, bereziki Urmendi Haurreskolaren kudeaketari dagokionez. Talde jeltzaleak tokiko gobernuak beharrezko adostasun politiko eta sozialik gabe neurriak hartu izana kritikatu du. "Gobernatzea ez da inposatzea; gobernatzea interes orokorra entzutea, adostea eta bermatzea da", dio bozeramaileak.

EAJ-PNVren arabera, erabaki horrek haur hezkuntzako sistema publikoa ahultzeaz gain, familiak ere zigortzen ditu, hezkuntzako lehen etapetatik aukera berdintasuna bermatzea eragozten baitu. “0-2 zerbitzua ez da elementu osagarri bat, kontziliaziorako, aukera berdintasunerako eta gizarte kohesiorako funtsezko tresna bat baizik. Ezin dugu onartu hain erabaki estrategikoak behar bezalako adostasunik gabe eta inprobisazioa oinarri hartuta hartzea ", gehitu du Mitxelenak.

Kezka Urmendi Haurreskolaren egoeragatik

Oiartzungo EAJ-PNV udal taldeak publikoki adierazi du kezkatuta dagoela Urmendi Haurreskolaren egoeragatik eta udal gobernuak bere etorkizunari buruz erabakirik hartu ez duelako. Irailetik gaur arte bi bilera baino ez dira egin Haurreskolak Partzuergoarekin, biak Partzuergoak berak deituta, eta udal gobernuak ez du inolako bilerarik sustatu, ezta proposamen argirik helarazi ere, Urmendirentzat zein eredu nahi duen azaltzeko. Haurreskola Partzuergoak berak ohartarazi zuen erabaki bat hartzeko epemuga urtarrilaren 30ean amaitzen zela, eta Udalak egun hori igarotzen utzi zuen, inolako eskaerarik edo alternatiba formalik aurkeztu gabe.

Publikoki adierazi duten bezala, Haurreskolak sare publikoan sartzeak familientzako zerbitzuaren egonkortasuna, bermeak eta segurtasun juridikoa indartzea ahalbidetzen zuen. Hala ere, udal gobernuak ez zuen epearen barruan jardun eta, gaur egun, otsail bukaeran, Urmendiren etorkizuna zein izango den jakin gabe jarraitzen dugu.

Geroago planteatu den proposamen bakarra — Haurreskolak Partzuergoa Urmendiko partzuergoaren barruan sartzea — ez da talde jeltzalearen iritziz alternatiba argia, ezta juridikoki sendoa ere, eta irtenbideak baino ziurgabetasun handiagoa sortzen du, haren benetako bideragarritasuna ez baita egiaztatu ez teknikoki ez juridikoki. EAJ-PNVtik defendatzen dutenez, funtsezko zerbitzu publikoa izanik, Urmendik publikoa izaten jarraitu behar du, eta biderik bermatzaileena Haurreskolak Partzuergoaren sarean integratzea da.

Oiartzungo EAJ-PNV bereziki kezkatuta dago egungo ziurgabetasunak familiei eta langileei zuzenean eragiten dielako. Egoera hori udal-gobernuaren aurreikuspen eta lidergo faltaren ondorio zuzena dela uste dute, hezkuntza-zerbitzu estrategiko bati buruzko erabakirik epe barruan hartu ez izanaren arduraduna baita.

Eredu publiko eta bermatzaile batekiko konpromisoa

0-2 zerbitzua ez da bigarren mailako elementu bat, kontziliaziorako, aukera berdintasunerako eta gizarte kohesiorako funtsezko tresna bat baizik. Horregatik, eredu publiko, egonkor eta bermatzaile batekin duten konpromisoa berretsi dute, eta udal gobernuari arduraz eta gardentasunez jokatzeko eskatu diote. “Zerbitzu hau funtsezkoa da berdintasunerako eta kohesio sozialerako, eta ezin dugu utzi inprobisazioak eta erabaki faltak gure familien ongizatean eragina izaten jarrai dezaten”, azpimarratu du Mitxelenak.

EAJ-PNVk lanean jarraituko du Urmendiren etorkizuna zehaztasunez, segurtasun juridikoz eta herriaren interes orokorrean pentsatuz erabaki dadin.