EAJ-PNVk salatzen du EH Bilduk EUDELen aurrekontuei egindako "blokeo justifikaezinak" euskal udalen aurrerakada "oztopatzen" duela
Alderdi jeltzaleak deitoratu duenez, "Ezker Abertzaleak kalte egiten die udalei, bere taktika politikoari lehentasuna ematen diolako eta, bere botoarekin, Euskadiko Udalen Elkartearen aurrekontuak onartzea eragotzi duelako, etxebizitzaren, tokiko enplegu publikoaren, gizarte-zerbitzuen, berdintasunaren, zaintzaren edo euskararen arloetan funtsezko lan-ildoak garatzea ahalbidetuko lioketenak
19Otsailak OtsailaK 19 |
Kongresua
EH Bilduk EUDELen aurrekontuak "arrazoirik gabe blokeatu izana" salatu du EAJ-PNVk, udalentzat "ondorio zuzenak izango dituen taktika politikoko erabaki batengatik". "EH Bilduk akordioak adosteko duen ezintasuna" agerian geratu da gaur Euskal Udalen Elkartearen Batzar Nagusian, Zumarragan, eta bertan izan dira Euskal Autonomia Erkidegoko udaletako arduradunak.
Alderdi jeltzalearen ustez, "bereziki larria" da gaur gertatutakoa, EH Bilduren botoak EUDELen proiektu estrategikoak abian jartzea, ekimen berriak garatzea edo udalerrietako egunerokotasunari zuzenean eragiten dioten funtsezko lan-ildoei jarraipena ematea galaraziko duelako. "Geldiarazi egiten ditu udal-lankidetzan, udalentzako laguntzan eta tokiko kudeaketaren modernizazioan beharrezkoak diren aurrerapenak". Gainera, "zalantzan jartzen ditu lortutako aurrerapenak eta Udalhitzen etortzeke daudenak", tokiko enplegu publikoan egonkortasuna, plangintza eta kalitatea bermatzeko lan-harremanak negoziatzeko sektore-esparru bateratua delarik.
Jeltzaleek adierazi dutenez, aurrekontua ez onartzeko EH Bilduk erabilitako argudioa, zuzendaria aukeratzeko eredua aldatzea hain zuzen, "erakundearen espirituarekin bateraezina den inposizioa" besterik ez da. Ildo horretan, EAJ-PNVk uste duenez "Ezker Abertzalearen eskakizunak ez dira herritarren bizitza hobetzeko alderdi ekonomikoetan oinarritzen, baizik eta EUDELen zuzendariaren moduko profil tekniko-juridiko bat bere inguruko profil politiko bihurtzeko premia larrian". Aitzitik, jeltzaleek uste dute Euskadiko Udalen Elkarteak "gobernu politikoa eta zuzendaritza teknikoa" izan behar dituela, "funtzionamendu ona eta inpartziala izan dezan".
EUDELen presidente eta Derioko alkate Esther Apraizek 2026rako ekintza-ildoak aurkeztu ditu hitzaldi nagusian, besteak beste, etxebizitzaren, tokiko enplegu publikoaren, gizarte-zerbitzuen, errolda sozialaren, berdintasunaren, zaintzaren edo euskararen arloan udalei ematen zaien zerbitzua indartzeko. Era berean, alkateen arteko lankidetzarako deia egin du, udalen erronka handiei erantzukizun demokratikoko garai honetan aurre egiteko: "Lankidetzarako garai berri batean gaude. Olatu autoritarioaren eta polarizazioaren aurrean, udaletatik elkarrekin lan egin behar dugu herritarren konfiantza mantentzeko, zerbitzu publikoak eta aurrerapen politikak babestuz".
