Babesen inguruko akordioa onetsi du EAJ-PNVk Euroganberan, Mercosurreko akordioan lehen sektorea babestera begira
Eurodiputatu jeltzaleak ildo beretik bozkatu du ardogintza-mahastigintza sektorea babesteko neurri berriak ezartzearen alde eta Europako ardoak sustatzeko finantzaketetan sartzeko aukerak hobetzeko
Europako Parlamentuak gaur, asteartearekin, EAJ-PNVren aldeko botoarekin, argi berdea eman dio Mercosurreko herrialdeekiko akordio komertzialean lehen sektorearen babesa areagotzeko ezarri nahi den segurtasun sare berriari. Behin indarrean jartzen denean, babes klausulei buruzko araudiak nekazariak babesteko sistema eraginkorra bermatuko du, zeinak produktu sentikorren kasuan hiru asteko gehienezko epe batean Europaren esku hartzea ahalbidetuko duen mekanismoa aktibatuko baita.
“Lehen sektorea babesteko eta produktuen kontrola areagotzeko diseinatutako mekanismoa da hau, Europako Batzordeari ahalbidetuko diona arintasun handiagoz esku hartzea, inportazioen gorakadaren eraginez merkatuan arazoak eragiten badira edo prezioen bat-bateko beherakada ematen bada, bide beretik gure nekazal sektorea kaltetua ateratzea saihestuz. Horrekin erakutsi nahi da behar besteko neurriak hartzeko prest gaudela liberalizazio komertziala Europako nekazal sektorearen kaltetan egin ez dadin”, baloratu du eurodiputatu jeltzale Oihane Agirregoitiak.
Erregelamendu berriak, Kontseiluaren eta Europako Parlamentuaren artean adostutakoak, EBri EBko Mercosur akordioan aurreikusitako muga-zergen lehentasunak aldi baterako etetea ahalbidetuko dion prozedura ezartzen du — EBko Justizia Auzitegiak, Europako Parlamentuaren osoko bilkurak legezko iritzia eskatzeko erabakia hartu ondoren, erabaki horren zain dago —, baldin eta inportazio horiek EBko ekoizleei kalte egiten ari zaizkiela uste bada; besteak beste, behi-haragia, arrautzak, arroza, eztia, oliba-olioa edo zitrikoak inportatzen badira.
Egin diren negoziaketetan, Europako Parlamentuak nekazarien babesa indartzea lortu du, ikerketa bat abiarazteko aurreikusitako atalasea beheratuta. Ikerketa hori produktu sentikorren inportazioak batez beste % 5 igotzen direnean edo prezioak ehuneko berean jaisten direnean egingo da, sektoreari kalte larririk ez eragiteko. Gainera, epe laburragoak ezartzen dira babesak aktibatzeko, produktu sentikorren kasuan behin-behineko neurriak gehienez 21 eguneko epean hartzeko aukera aurreikusiz, eta inportazioen etengabeko gainbegiratze proaktiboa eginez jarraipen-txostenen eta are kontrol handiagoaren bidez.
Mahastizaintza eta ardogintza
Babes berriez gain, gaur bertan egin den osoko bilkuran ardoaren sektorerako lege-multzo berri baten alde bozkatu du eurodiputatu jeltzaleak, sektoreak klima-aldaketari eta ekoizleek dituzten erronkei aurre egiteko eta merkatuaren joera berriei erantzuteko eta aukera berriak irekitzeko. Esate baterako, hondamendi natural larrien, fenomeno meteorologiko kaltegarrien, landare-gaixotasunen agerraldien edo izurriteen kasuan, mahastizainek bete urtebete bat gehiago izango dute kaltetutako mahatsondo-barietateak landatzeko edo birlandatzeko, eta krisiari aurre egiteko neurriak finantzatu ahal izango dira Europako funtsekin.
Araudian jaso diren aldaketek, halaber, jatorri-deitura babestuen eta adierazpen geografiko babestuen egoera hobetuko dute, enoturismoa sustatzeko laguntza gehigarria jaso ahal izango baitute. Halaber, hirugarren herrialdeetan kalitatezko ardo europarrak sustatzeko kanpainen Europako finantzaketa hobetzea aurreikusten da, publizitatearen, ekitaldien edo azterlanen bidez. Agirregoitiak positibotzat jo du arau berriak onartu izana, eta kalitatearen eta sustraitzearen aldeko apustua egiten dutenei laguntzearen garrantzia gogorarazi du. "Sektorea modernizatu behar da, baina gure jatorri-deiturak desegin gabe eta balioaren alde egiten dutenak atzean utzi gabe. Euskadi etorkizunean inbertitzen ari da, prestakuntza, berrikuntza eta lurraldea lotzen dituzten eta Arabako Errioxako mahastizaintza eta ardogintza industriarentzat, Nafarroako ardoentzat, txakolinarentzat eta sagardoarentzat estrategikoak diren proiektuekin", nabarmendu du.
