EAJ-PNVk Mikel Mancisidor Ararteko berriaren zorroztasuna, ibilbide profesionala eta aniztasuna baloratu ditu

Eusko Legebiltzarrak gaur Mikel Mancisidor de la Fuente izendatu du Ararteko berria, Ganberaren babes zabalarekin. Hautagaitza EAJ-PNVk eta PSE-EEk elkarrekin proposatu dute, euskal sistema demokratikoarentzat funtsezkoa den erakunde bat indartzeko eta herritarren eskubideen defentsa eraginkorra bermatzeko borondatearekin.

Legebiltzarreko eztabaidan, EAJ-PNVko ordezkari Xabier Barandiaranek azpimarratu du Arartekoa dela “administrazio publikoen jardun desegokien aurrean herritarrei babesa eskaintzeko, kexak eta kontsultak bideratzeko eta politika publikoen hobekuntzan laguntzeko funtsezko erakundea”. Ildo horretan, bere funtzioa bereziki garrantzitsua dela nabarmendu du zaurgarritasun egoeran dauden pertsona eta kolektiboen babesean.

Talde jeltzaleak defendatu du Mikel Mancisidorreren profila egokia dela karguaren eskakizunei erantzuteko: zintzotasuna, neutraltasuna, interes orokorrarekin konpromisoa eta balio demokratiko sendoak. “Arartekoak independentziatik jardun behar du, giza eskubideen errespetuan, berdintasunean, aniztasunean eta edozein indarkeria motaren gaitzespenetik”, adierazi du Barandiaranek. Halaber, balioan jarri du Ararteko berriaren prestakuntza zabala eta ibilbide profesional sendoa, zuzenbidearen, giza eskubideen eta gobernantza demokratikoaren esparruetan, bai Euskadin bai nazioartean. Halaber, agerian geratu da Mancisidor euskalduna dela, hedabideen aurrean egin dituen adierazpenak osorik euskaraz egin baititu.

EAJ-PNVk nabarmendu du, gainera, Mancisidorrek bere ibilbidean jaso duen aitortza plural eta zeharkakoa, ikuspegi politiko ezberdinetatik konfiantza sortzeko duen gaitasunaren erakusgarri. Testuinguru horretan, Barandiaranek dei egin du “herrialde ikuspegia eta oinarrizko adostasunak alderdi arteko desadostasunen gainetik jartzera”, gogoraraziz Arartekoa adostasun zabalak eskatzen dituen erakundea dela.

“Izendapen honekin, Euskadik demokraziarentzat eta pertsona guztien eskubideen defentsarentzat funtsezkoa den erakunde bat indartzen du”, amaitu du parlamentari jeltzaleak.