EAJ-PNVk Berdintasun ministroaren konpromisoa lortu du emakumeen aurkako indarkeriaren biktimentzako laguntzen dekretuak parekatzeko
María Dolores Etxanok genero-indarkeriatik babesteko eta sexu-askatasuna osorik bermatzeko legeen laguntzak bateratzea eskatu du, sexu-indarkeriarako laguntza ekonomikoen baldintza onuragarrienak eta aurrerapen esanguratsuak aplikatuko direla bermatuz
EAJ-PNVko Maria Dolores Etxano senatariak emakumeen aurkako indarkeria matxisten biktimentzako laguntzak arautzen dituzten dekretuak parekatzeko eskatu dio berriz ere Berdintasun ministroari. Gaurko kontrol saioan, Ana Redondo ministroak Genero Indarkeriaren Lege Organikoa aldatzeko konpromisoa agertu du, laguntza horiek parekatzeko.
Ekainean Berdintasuneko arduradunari jakinarazi zion bezala, Etxanok gogorarazi du 1452/2005 eta 664/2024 Errege Dekretuek genero-indarkeriaren aurkako babes-neurriei buruzko 1/2004 Lege Organikoetan eta sexu-askatasunaren berme integralari buruzko 10/2022 Lege Organikoan ezarritako dirulaguntzak arautzen dituztela. Hala ere, lehenengoak ez dira bigarrenak bezain aurreratuak, ez dira hain inklusiboak eta malguak. "Genero-indarkeriarako, enplegagarritasun-txosten bat eskatzen da, sexu-indarkerien biktimentzat beharrezkoa ez dena. Laguntzak eskuratzea murriztaileagoa da: Genero Indarkeriarako Lanbide arteko Soldataren %75 eta Sexu Indarkerian Lanbide arteko Gutxieneko Soldataren %100. Ordainketa-modalitatean, laguntzen luzapenetan, eskaera-epeetan edo eskatutako dokumentazioan eta bateragarritasunean ere aldeak daude", zehaztu du Etxanok.
Emakumeen aurkako indarkeria matxistaren aurkako nazioarteko egunean, ordezkari jeltzaleak ministroari errepikatu dio Euskadik hasia duela laguntza horiek ematea eta ordaintzea arautzen duen dekretua egiteko prozedura, izapideak hasi zituen lehen erkidegoa izanik. Hala ere, Estatuaren laguntzek –kudeaketa eta ordainketa autonomia-erkidegoek egiten dute– desberdintasunak sortzen dituzte euskal Berdintasun Legean aurreikusitakoekin, non ez diren bereizten biktima motaren araberako laguntzak. "Emakundek eta hainbat adituk laguntza biak parekatzeko eskatu dute, sexu-indarkeriaren arloko laguntza ekonomikoen baldintza onuragarrienak eta aurrerapen esanguratsuak aplikatuko direla bermatuz". Azaldu duenez, baldintza horiek ezin dira Euskadiko dekretuaren bidez aldatu, oinarrizko araudia direlako, eta aldaketak egin behar dira, ez bakarrik errege-dekretuetan, baita horiek sortzen dituen Genero Indarkeriaren Lege Organikoan ere.
