Vaquerok Sánchezi exijitu dizkio berrerortze anizkunari aurre egiteko tresnak: “Baliabideak falta ditugu”
Espainiako gobernuak Euskal Taldeari aitortu dio berrerortze anizkuna dela segurtasun arloan egun ematen den arazorik nagusienetakoa, bozeramaile jeltzaleak fenomeno hau “elkarren eskutik eta alarmismotik urrunduta” aztertzeko egin dion eskaria aintzat hartu du eta zigorrak gogortzeko eta sistema modernizatzeko ekimenak izapidetzea hitzeman du
“Delituetan ematen den berrerortze anizkuna murriztu beharra dugu. Segurtasuna ardura nagusia da gure kaleetan eta ezerk kezka eragiten badu, konpontzeko modua bilatu behar dugu”, proposatu dio gaur, asteazkenarekin, Maribel Vaquero euskal Taldeko bozeramaileak Espainiako gobernuko presidenteari. “Hobe elkarren artean eta albait arinen egiten badugu zentzuzko neurriekin, alarmismoa, sektarismoa, beldurra eta buloak hobesten dituztenenegandik urrunduz”, gaineratu du osokoan egin duen galderan, eta fenomenoari aurre egiteko neurriak exijitu ditu.
Kaleko lapurretak “ez dira delitu larriak, baina segurtasunik ezaren eta zigorgabetasunaren sentsazioa uzten dute, denboran epaitzen ez direnez, preskribitu egiten direlako eta poliziaren lanak eraginik ez duen sentsazioa indartzen da, eta pertsona batzuei ez zaizkiela legeak aplikatzen. Kalean esaten den moduan, toki batetik sartu eta bestetik ateratzen direla”, azaldu du eta jarraian gaineratu duenez “ honezkero denok dakigu fenomeno hau konpontzeko ez dela soilik Zigor Kodea gogortu behar, baizik eta, horri lotuta, tresnak eta baliabide nahikoak behar direla lapurreta txiki horiek guztiak denbora eta era egokian epaituak izan daitezen”. Hori dela eta, errefortzua eta Euskadiko auzitegiak berrantolatu behar dira, daukaten lan karga hartu ezinik jarraitzen dutelako: “Baliabideak behar dira”.
Horri lotuta, Vaquerok Sánchezi eskatu dio berrerortze anizkunari buruzko ekimena eztabaidara eraman dezala, zeinaren zuzenketak aurkezteko epea aspaldi itxi baitzen. “Haren zain gaude”, esan du.
Sánchezék euskal diputatuak luzatu dion proposamena aintzat hartu du eta parlamentuan ziurtatu dio Kongresuan ekimen legegile hau izapidera eramateko prest dagoela berrerortze anizkuna segurtasun alorrean ematen den “arazorik nagusienetakoa” delako eta justiziaren “modernizazioan” eragingo duela, prozedurak arintzera begira.
