Legealdi erdian egindako lanaren eta Ibarraren etorkizunarekiko konpromezuaren balantzea
EAJ-PNV Udal taldeak oposizioan egindako lana eta ibartarren ongizatea ardatz duen Ibarraren etorkizunarekiko konpromisoa azpimarratu ditu.
27Urriak UrriaK 27 |
IBARRA
Bi urte igaro dira legealdia hasi zenetik, eta une egokia da balantzea egiteko. EAJ-PNVk, Ibarran, 2023an hartu zuen konpromisoari eusten dio: oposizio eraikitzaile eta arduratsua, beti ibartarren ongizatea erdigunean jarriz.
Bi urte hauetan, talde jeltzaleak eguneroko lana eta udalerriko benetako arazoei arreta jartzea izan ditu lehentasun. Irtenbide praktikoak bultzatu dituzte, hala nola hiri-altzarien mantentzea, eta proposamen zehatzak aurkeztu dituzte Madariaga Jauregiari erabilera egokia emateko, beste hainbat interes publikoko gaietan bezala. Herritarrenganako hurbiltasunean eta bizilagunen egunerokotasunerako hobekuntza erabilgarrien bilaketan oinarritu da bere lana.
Taldeak Politikarien Batzordearen bileretan parte hartu du bi astean behin, eta bertan proposamenak eta oharrak helarazi dituzte. Herri bileretan ere aktiboki parte hartu dute, hala nola IUPIn edo jai batzordeetan, betiere ekarpenak egiteko eta eraikitzeko asmoarekin.
Era berean, EAJ-PNVk gainerako udalekin lankidetzan jardun du 2030 Agendaren topaketetan, eta, legegintzaldiaren hasieratik, mugikortasun plan berri baten beharra azpimarratu du. Ildo horretan, IUPIrekin lan estua egin dute Ibarrako iparraldeko eremuaren garapenean, eta konpromiso horri eusten diote oraindik ere.
Taldearen helburu nagusietako bat da IUPI eta Apatta 2 planak behin betiko amaitzea, Ibarrari etorkizun hobea eskaintzeko ezinbestekoak direlakoan, bai bizi-kalitateari dagokionez, bai enplegu-aukeretan.
EAJ-PNVk etxebizitzaren arloan ere bere konpromisoa mantentzen du. Etxabeak etxebizitza gisa egokitzeko aukera ematen duen ordenantza berria positiboki baloratzen badute ere, nahikotzat ez dute jotzen. Ibartar askok oraindik ere bizilekua beste udalerri batzuetan bilatzen dute, eta horregatik, etxebizitza irisgarri eta jasangarriak bermatuko dituzten neurriak bultzatzen jarraitzea beharrezkotzat jotzen dute, bereziki gazteei zuzendutakoak.
EAJ-PNVk legealdia hasi zuen jarrera berari eutsiko dio: hurbiltasuna, entzutea eta konpromisoa. Eguneroko lana, ahalegina eta erantzukizuna ardatz dituen politika egiteko modua defendatzen dute. Helburua argia da: Ibarraren etorkizunerako funtsezko proiektuetan aurrera egitea —hala nola IUPI eta Apatta 2 planak amaitzea— eta ibartar guztien bizi-kalitatea hobetzen jarraitzea.
