EAJ-PNVk Garraio ministroaren konpromisoa lortu du Loiuko aireportuan hegaldiak 24 ordura ez luzatzeko

EAJ-PNVko Igotz López senatariak eskatuta, Garraio eta Mugikortasun Jasangarriko ministroak ziurtatu du Loiuko aireportuko terminala zabaltzeak ez duela ekarriko hegaldiek eguneko 24 orduetan lan egitea. Gaur arratsaldeko kontrol saioan, senatari jeltzaleak Oscar Puente ministroari jakinarazi dio aireportutik gertu dauden udalerrietan kezka sortzen duela terminalaren zabaltzeak bere ordutegi operatiboa zabaltzea (gaur egun, 06:45etik 23:30era bitartean) eta, ondorioz, gaueko hegaldiak egitea ekar lezakeelako.

"Inbertsioekin, Txorierriko, Erandioko, Leioako, Getxoko eta Berangoko bizilagunen beldurra da gaueko hegaldiak izatea, eta horrek larriki aldatuko luke haien atsedena eta osasuna", azaldu du Lópezek, eta ministroari galdetu dio ea Gobernuak edo AENAk "pentsatu duten, orain edo etorkizunean", Loiuko aireportuko ordutegi operatiboa gauera ere luzatzea; Puentek ordutegia “gaur egun dagoen moduan mantenduko” dela ziurtatu du. Azkenik, López Torrek obrek ahalik eta eragin txikiena izatea eta erabiltzaileei zerbitzu egokia bermatu ahal izatea ere eskatu du, "are gehiago, duen erabiltzaile kopuru handia, eta euskal mugikortasunean eta ekonomian duen zeregina kontuan hartuta".

Espainiako Gobernuak ia 13.000 milioi euroko inbertsioa iragarri du 2027tik 2031ra bitartean Estatuko aireportuen sarea modernizatu eta handitzeko, tartean Loiu-Bilboko aireportuko terminala handitzea, eta Hondarribian "inbertsio xumeak" eta Forondan "gutxieneko inbertsioa" eginez, senatari jeltzalearen hitzetan. Bilboko aireportuaren ordutegi operatibo ofiziala 06:45etik 23:30era bitartekoa da, urteko egun guztietan – H18 deritzona –, baina 01:00ak arte ere luza daiteke atzerapenak edo beharrizan bereziak dituzten hegaldiak egiteko, hegazkin-konpainiek Beharrezko Aurretiazko Baimena eskatzen badute.