Europako Parlamentuan Gazaren alde agertzeko eta Israel gaitzesteko onetsi den ebazpena babestu du EAJk
Ebazpenak ondorengoak babesten ditu: Israelgo eskuin muturreko kolonoei eta ministroei zigorrak eskatzea, Israelekin Elkartzeko Akordioaren zati komertziala etetea, biztanleria gazatarrari mugarik jarri gabe laguntza humanitarioa ematea eta estatu palestinar bat ezartzea eta onartzea, bi estaturen konponbiderako bidean aurrera egiteko
11Irailak IrailaK 11 |
Europako Legebiltzarra
Europako Parlamentuak Gazaren alde agertzeko eta Israel gaitzesteko ebazpen bat onartu du gaur, ostegunarekin, EAJ-PNVren babesarekin eta aldeko 305 botorekin, proposamenak kontrako 151 boto eta 122 abstentzio jaso dituela. Israelgo Gobernua egiten ari den genozidioaren aurrean Gazak bizi duen egoera lazgarriaren inguruan legegintzaldi honetan eman duen lehen erabaki handia da.
Testuak "Gaza egoera larrian: gosearen aurka borrokatzeko Batasunaren neurriak eta bahituak askatzeko premiazko beharra eta bi estaturen konponbide baterantz aurrera egitea" izenburua du, eta Europako Batzordeko presidenteak atzo iragarritako neurriak babesten ditu. Izan ere, Benjamin Netanyahuren gobernuko eskuin muturreko ministroen eta kolono bortitzen aurkako zigorrak proposatu zizkien estatu kideei, bai eta EBren eta Israelen arteko Elkartze Akordioaren zati komertziala, Israelekin aldebiko lankidetza eta Israelek Europako ikerketa-programetan (Horizon, kasu) parte hartzea etetea ere. Gainera, Israelen kokaguneak hedatu izana, Palestina onartu duten estatu kideei gobernuak emandako errepresaliak eta "nahitaezko desplazamenduak" gaitzetsi ditu.
"Negoziatzeko ahalegin handia egin dugu azken hiru egun hauetan. Agian ez da nahi bezain urrun joango. Sentitzen dut, adibidez, testuan ezin izana sartu gertatzen ari dena genozidioa dela, baina, zalantzarik gabe, Israelgo Gobernuari eta Gazan ikusten ari garen genozidioan izan duen erantzukizunari egindako gaitzespena da", nabarmendu du Oihane Agirregoitia eurodiputatu jeltzaleak, eta Gazan gosetea "nahita eragin "egin dela eta Renew Europe, S & D eta Berdeek proposatutako testua aurrera atera ez izana deitoratu du,"Gazan genozidioa egiten ari diren ebidentzia argia" dagoela aipatzen zutelako.
Hala eta guztiz ere, adierazpenak gogor gaitzesten du "Gazara bidalitako laguntza humanitarioa Israelgo Gobernuak oztopatu izana, Gazako iparraldean gosetea eragin baitu, eta premiazkoa da elikagaiak, ura, hornidura medikoak eta babesa" erabat, azkar, seguru eta oztoporik gabe "eskuratzeko aukera ematea, mugako pasabideak irekitzea eta UNRWA Nazio Batuen Erakundeak Palestinarako duen agentziari laguntza berrezartzea.
Mozioak "berehalako su-eten iraunkorra" eskatzen du, "Gazan bahituta dauden israeldar guztiak, bizirik daudenak zein hildakoak, berehala eta baldintzarik gabe askatzea", eta "Hamasek Israelen aurka egindako krimen basatiak" gaitzesten ditu. Testuan, halaber, Benjamin Netanyahuren Gobernuari gogorarazi diote "Israelen operazio militarrek ondorio humanitario suntsitzaileak eta sufrimendu onartezina" eragin dituztela biztanleria zibilarentzat, "bereziki alderik txarrena eramaten ari diren haurrentzat".
Eurodiputatuek gerrako krimen guztien eta nazioarteko zuzenbidearen urraketen ikerketa sakonak ere eskatu dituzte, eta "erantzule guztiek kontuak eman ditzatela". Zisjordanian eta ekialdeko Jerusalemen okupatutako kolono eta ekintzaile israeldarren aurkako zigorrak babesten dira, eta bi ministro israeldar zigortzeko eskatzen da. Azkenik, gogorarazi du EBko kanpo ekintzako zerbitzuek ondorioztatu dutela Netanyahuren gobernua "giza eskubideen arloko betebeharrak nabarmen urratzen" ari dela, eta EBko estatuei eskatu die Nazioarteko Zigor Auzitegiaren atxilotze aginduak betearazteko eta errekonozimendua proposatzeko.
