EBBk "onartezin" jo du Azpeitian Udal-bulegoen kontra egin den erasoa, eta EH Bilduri deitoratu dio gertakari horren aurrean erakutsi duen jarrera

Aurreko asteburuan Azpeitian eman diren gertakarien balorazioa egin du gaur EAJ-PNVren EBBk bere asteroko batzarrean. Izan ere, gazte talde bat herri horretako Udal-bulegoetara indarrez sartu zen bertan zeuden Ertzain eta Udaltzainei eraso eginez.

Donostian batzartuta, jeltzaleen Euzkadi Buru Batzarrak “oso larri eta kezkagarri” jo ditu asteburuko gertakariak, eta Ertzaintzari eta Udaltzainei babes osoa adierazi eta eskaini die, herritarren segurtasuna bermatzeko elementu nagusi diren heinean, azken asteotan Gipuzkoako hainbat udalerritan jasan dituzten “eraso eta seinalamendu onartezinen aurrean”. Beasain eta Hernanin eman ziren lehen eta Azpeitian izan dira azkenak, asteburuan bertan.

EAJ-PNVk deitoratu duenez "indarkeriazko jokaera hauek gogora ekartzen dizkigute iraganean bizi izandakoak, euskal gizarteak berriz bizi nahi ez dituenak”. Ildo beretik, ordezkari politikoei dei egin die “albo batera begira gera ez daitezela, dagozkien erantzukizunez jabetu daitezela eta ikuspegi zabala izan dezatela, guztion artean halako jokabideei behin betiko amaiera emateko”.

Hala, EH Bilduk orain arte erakutsi duen jarrera salatu du EBBk eta deitoratu dio “berriz ere, euskal gizartearen gehiengo nagusiarentzat indarkeriazko jokabide diren hauek gaitzestetik urrun geratu dela, ezin baitira onartu, ezta berriz errepikatu ere”. Are gehiago, EAJ-PNVk kritikatu du "bere erantzukizuna onartu beharrean, EH Bilduk saihestu egin duela bere familia politikoarekin zerikusirik ez duten errudunak aipatuz".

Azkenik, EBBren ustez, "gertakari horiek indarkeriaren permisibitatearen eta indarkeria legitimatzeko kultura politiko baten ondorio dira", eta beldur da "indarkeria agertze onartezin horiek portaera jarraibide bat izango ote diren", eta hori errepikatu ahal izango dela udan zehar ospatzen diren jai desberdinetan. Horren aurrean, EAJ-PNVk errespetuan eta lidergo etikoan oinarritutako kultura demokratikoa eta bizikidetza aldarrikatzen du.