Euskal Taldeak ospatu egin ditu autogobernuaren arloan eman diren aurrerapausuak, baina ohartarazi du ez duela erdibideko itunik nahi: "Osorik bete egin behar da"
EAJ eta PSOE arteko hitzarmena betez, Eusko Jaurlaritzaren eta Espainiako Gobernuaren arteko Aldebiko Lankidetza Batzordean atzo Moncloan egin zen bileran, Gizarte Segurantzaren arloan pauso “garrantzitsu” eta "esanguratsuak" eman zirela nabarmendu du Maribel Vaquerok, baina Estatuari transferentzia burutzeko orduan duen beldurra galtzeko eskatu dio, transferentziari heltzera animatuz: "Errebalidan itxarongo dizugu"
"Aurrerapen esanguratsuak dira, garrantzi politikoa dutelako, eta Gizarte Segurantzari dagokionez euskal autogobernuari gehiago ematen zaiolako. Ateren bat ireki eta askatu da, eremu horretan sartu ahal izateko. Baina Gizarte Segurantzaren zati handi bat falta da, akordio hori egiteke dago oraindik, eta bete eta lortu egin behar da", ziurtatu du gaur, asteazkenarekin, Maribel Vaquero bozeramaileak, Imanol Pradales lehendakariak eta Pedro Sanchez Espainiako Gobernuko presidenteak atzo Moncloan egin zuten bileraren ostean, Eusko Jaurlaritzaren eta Espainiako Gobernuaren arteko Aldebiko Lankidetza Batzordean, EAJren eta PSOEren arteko inbestidura ituna betez.
Onda Vascan egin dioten elkarrizketan Vaquerok aitortu du atzo aurkeztutakoak esan nahi duela oraindik egin beharrekoak geratzen direla ituna betetzeko, baina gogorarazi du EAJk emandako pauso bakoitza autogobernu zabalagorako beste aurrerapauso bat dela. "Estatuaren erresistentziak" gorabehera, beti dago hobekuntza bat, eta Euskal Taldeak lanean jarraituko du, amore eman gabe.
Bozeramaile jeltzaleak euskal autogobernuaren garapenari "beldurra" galtzeko eskatu dio Estatuari, Gernikako Estatutuan jasota baitago "nahitaez bete beharreko lege organikoan", eta gogorarazi du Gizarte Segurantzaren erregimen ekonomikoaren transferentziarekin ez dela "kutxa bakarra hautsiko". "Zalantzak eragiten dituzten kontuak azalduko ditugu, argitzeko, eta Gizarte Segurantzaren transferentzia osoa lortzeko", esan du. Baina Sanchezi bizkortasuna eskatu dio, legegintzaldiaren erdialdea gainditu delako: "Errebalidan itxarongo dizugu,aukera batzuk dituzu aurten transferentzia gehiago sartzeko".
Lortutako akordioak
Aste honetako asteartean, lehendakariak azaldu bezala, Euskadik autogobernu-eskumenetan aurrera egitea lortu du, Gizarte Segurantzaren eta Eskola Aseguruaren kotizaziorik gabeko prestazioak bere gain hartuta. Azken horri dagokionez, Euskal Taldeak azpimarratu du adostutakoaren edukia oso garrantzitsua dela, arlo horretan ez baita soilik osasun-babeseko ekintza aintzat hartzen; aitzitik, Gizarte Segurantzaren Diruzaintzaren kudeaketa ukitzen da lehen aldiz, oso gai sinbolikoa baita, Gizarte Segurantzaren eremuan beste ate bat zabaltzea delako.
Era berean, aldebiko bileran, Itsas Salbamenduaren transferentzia burutu zen, eta Osalanen funtzioak areagotu ziren, Barakaldon (Bizkaia) kokatuta dagoen Makineria Egiaztatzeko Zentro Nazionalaren (CNVM) transferentzia adostuz.
Gainera, urratsak eman dira aireportuen kudeaketaren transferentzian aurrera egiteko, aireportu-azpiegituren azpibatzorde bat sortuz. Azpibatzorde horrek lau hilabeteko epean aurkeztu beharko ditu emaitzak, baita MRR Europako Funtsen berresleipenean ere. Euskal Taldeak hori eskatu du Kongresuan azken asteetan, Espainiako Gobernuak bide-azpiegiturak egokitzeagatik (tunelak, esaterako) foru-aldundiei dagokiena transferi dezan.
Sare elektrikoetako inbertsioen egutegirako bidea ere ireki da azkenean, eta Euskal Taldeak denbora asko darama gai horretan sakoneko neurriak eskatzen, euskal industriari laguntzeko.
Talgo trena
Vaquerok Talgoren inguruan hartutako konpromisoa ere azpimarratu du. "Zaila izan da, duela astebete salatu genuen akordioa arriskuan zegoela" etengabe eragindako atzerapenengatik, eta azkenean "askatu egin da"; balio izan du Espainiako Gobernuak Talgo Euskadin errotzea bermatzen duen akordioa ixteko, Araban duen lantegia garrantzitsuenetakoa baita (Rivabellosa), zeinetatik "700 familia inguru" bizi baitira. "Adostutako 75 milioiak inbertituko ditu SEPIk, pozik gaude proiektuak aurrera egingo duelako".
Aurrekontuak
Urtea amaitu aurretik onartu beharko liratekeen Estatuko Aurrekontu Orokorrak aurkezteko beharrari dagokionez, bozeramaile jeltzaleak zalantzak agertu ditu posible ote den beste talde parlamentario batzuek jarri dituzten marra gorriengatik. "Guk aurreko proiektuetan akordioak lortu genituen, ez dakigu horiek berreskuratuko diren. Baina oraindik ez da gastu-muga aurkeztu, eta horrek esan nahi du Parlamentuko negoziazioa hasi ere ez dela egin", esan du.
