Oihane Agirregoitiak Edmundo Gonzalez Venezuelako hauteskundeetako irabazletzat jotzeko ebazpena bultzatu du Europako Parlamentuan

Oihane Agirregoitia EAJ-PNVko eurodiputatuaren ekimenez, Europako Parlamentuak ebazpen bat bozkatuko du datorren astean Estrasburgon egingo den osoko bilkuran, Edmundo Gonzalez Venezuelako presidentetzarako hauteskundeen irabazle gisa aitortzeko eta, aldi berean, uztailaren 28ko hauteskundeen ondoren herrialde horretan bizi den egoera politikoaren larritasuna salatzeko. Talde politiko guztietako buruak biltzen dituen Europako Ganberako presidenteen konferentziak gaur bertan erabaki du Josep Borrell Europako diplomaziaren burua elkarrizketa batera deitzera eta Agirregoitiak Renew Europe taldearen izenean sustatzen duen mozioa bozkatzea.

"Oso kezkatuta gaude herrialde horretan giza eskubideen urraketa larria gertatu delako", adierazi du jeltzaleak Venezuelan bizi den egoera politiko eta humanitarioari buruz. "Jakina denez, nazioarte mailan hauteskundeetan eman zen gardentasun eta egiazkotasunik eza salatu zen. Ez dago emaitzen akta ofizialik, eta inoiz egongo ez diren beldur gara", deitoratu du.

Edmundo Gonzalezek asilo politikoa eskatu eta Espainian babesa bilatu zuen aste berean heldu da ekimena (irailaren 8an iritsi zen). Renew Europe taldeak egin duen barne eztabaidetan, Agirregoitiak defendatu du Venezuelako oposizioko hautagaia dela, "publikoki eskuragarri dauden akten kopien arabera, hauteskundeetan gehiengo zabalarekin irabazi duena",Borrellek berak azken asteetan EBren izenean adierazi duen bezala. Halaber, euskal eurodiputatuak gogorarazi du Venezuelako hauteskunde-agintariek atzera bota zutela Europar Batasunaren misio batek hauteskundeetan behatzaile gisa parte hartzeko gonbidapena.

Agirregoitiak ildo beretik azpimarratu duenez, atzerrian botoa emateko eskubidea duten ia bost milioi venezuelarretatik % 1ek baino ezin izan zuten botoa hautestontzian eman, Venezuelako agintariek jarri zituzten oztopoen ondorioz, eta Nicolas Maduroren erregimenak Gonzalezen aurka emandako atxilotze aginduak eta hauteskunde prozesuaren osteko errepresioa salatu ditu, 2.400tik gora atxiloketa arbitrario, bortxazko desagerpenak eta gutxienez su-armek eragindako  21 heriotza eragin baitira. "EAJ-PNVk aurre egingo die beti errepresioari, diktadurari eta Madurori", eta "beti egongo da demokraziaren, askatasunaren eta giza eskubideen alde", azpimarratu du.

Eurodiputatu jeltzaleak sustatu duen ebazpen-proiektu honen bidez Venezuelako hauteskunde-agintariei eskatzen zaie  hauteskunde-mahai guztietako akta guztiak, botoen albait arinen argitaratzeko, eta hauteskunde-prozesuan erabilitako ekipo guztiak babesteko eta zaintzeko. Era berean eskatzen du arbitrarioki atxilotutako pertsona guztiak askatzea, errepresioa eta gizarte zibilaren eta oposizioaren aurkako erasoak etetea, giza eskubideen urraketekin amaitzea eta Venezuelan geratu diren oposizioko liderrak babestea, hauen artean María Corina Machado Europako Ganberako talde politikoak lanean hasiko dira orain ebazpen bateratu bat adosten saiatzeko. Eztabaida astearte arratsaldean egingo da eta ebazpenaren bozketa ostegunean egingo da.