Urkullu Lehendakariak adierazi du euskal diaspora “bizirik dagoela” eta aurrera egiten jarraitu nahi duela

Jean-René Etchegaray Iparraldeko Mankomunitateko presidentearekin batera, Donibane Garazin Euskal Diasporaren Nazioarteko Eguna dela-eta antolatutako ekitaldiaren buru izan da
Urkullu Lehendakariak adierazi du euskal diaspora “bizirik dagoela” eta aurrera egiten jarraitu nahi duela
08
Iraila
Eusko Jaurlaritza
PARTEKATU
08 Iraila | Eusko Jaurlaritza

Lehendakariak ziurtatu du euskal diaspora bizirik dagoela, eta aurrera egiten jarraitu nahi duela. Horregatik, elkarrekin arraun egiten jarraitzearen alde agertu da. Iñigo Urkullu, Jean-René Etchegaray Iparraldeko Mankomunitateko presidentearekin batera, Euskal Diasporaren Nazioarteko Eguna dela-eta antolatu den ekitaldiaren buru izan da gaur arratsaldean Donibane Garazin.

Eusko Jaurlaritzaren ordezkaritza zabalaz gain, ekitaldian izan dira Bidasoaren bi aldeetako agintariak, kulturaren, akademiaren, politikaren eta gizarte-erakundeen ordezkariak, bai eta euskal diasporarekin harreman zuzena duten familiak ere.

Horien aurrean, Lehendakariak gogorarazi du Euskal Herria duela mende batzuetatik hona herri emigrante bat dela, herrialde berrietan integratzeko hasierako zailtasunak ezagutzen dituena. Garrantzitsua da gogoan izatea gaur gure atera deitzen dutenean eta etorkizun hobea baino bilatzen ez duten migratzaileak hartzea dagokigunean.

Hala, adierazi duenez, “gu ere hartu gintuzten eta hartzen gaituzte eta harrera egin behar diegu”, eta, aldi berean, defendatu du Europak sustraiez alda dezala eta babes bila dabiltzanak eta etorkizun berri bat bilatzen ari direnak hartzeko eta gizarte gisa beste alde batera ez begiratzeko politika komun bat onar dezala. 

Iparraldeko Mankomunitateari eta Donibane Garaziko udalerriari eskerrak eman ondoren Euskal Diasporaren Egun hau antolatzen emandako laguntzagatik, Iñigo Urkulluk aitortu du euskal komunitateak kanpoan egiten duen lan isila, boluntarioa eta etengabea, XXI. mendean ere erreferente izaten jarraitzeko bidean dagoena. 

Etorkizunari begira, lehendakariak bi ekimen nabarmendu ditu: Han eta Hemen proiektua, plataforma digital eta globala, mundu osoko euskaldunei zuzendua, informazioa eta baliabideak elkarrekin trukatzeko eta esperientziak partekatzeko, eta Kanpoan diren Euskal Komunitateen Legea eguneratzea, erronka berriei aurre egiteko. Hala, iragarri du udazken honetan euskal diasporari eta legebiltzar-taldeei helburu hori parekatzeko, eztabaidatzeko eta osatzeko proposamen bat helaraziko zaiela. 

Bestalde, Jean-René Etchegarayk ziurtatu du Eusko Jaurlaritzak eta Iparraldeak funtsezko ikuspegia partekatzen dutela, “gure lankidetzaren oinarria osatzen duena”. “Munduaren beste aldeko euskaldunek ere gure kultura aberastu dute, gure hizkuntza garatu ahal izan dute beren harrera-lurraldean inspiratuta, beren ingurunera egokituz beren nortasunari eutsiz”- esan du. 

Iparraldeko Elkargoaren presidentearen iritziz, erbesteko lurra izatea abegi-lurra izatea ere bada. “Horren erakusgarri dira gure lana eta gure bideetatik igarotzen diren migratzaileei, batzuetan beren bizitza arriskuan jartzen dutenei, harrera duina emateko dugun konpromiso bateratua” –adierazi du. 

Euskal Diasporaren Nazioarteko Eguna 

Diasporaren Egunaren bosgarren edizio hau herritarrei irekitako ekitaldi instituzional bat izan da, Eusko Jaurlaritzak eta Iparraldeko Elkargoak elkarrekin antolatua, Pirinioen bi aldeetako euskaldunak kanpoan lotzen dituen errealitate kulturala aitortzeko. Ekitaldia Donibane Garazi herrian egin da, XX. mendean euskal emigrazioarekin lotura handia duen herrian. 

Besteak beste, erakusketa txiki bat aurkeztu da Udaletxearen aurrean, euskal emigrazioak izan duen eta duen garrantzia ezagutu eta aitortzeko. 9 panelen bidez, erakusketak ibilbide bat egiten du euskal emigrazioaren etapetan zehar, 100 argazki eta dokumentu baino gehiagorekin. Euskal Herriak XIX. mende hasieratik gaur egun arte partekatzen duen historia zoragarri baten berri ematen dute horiek guztiek. 

Horrez gain, Munduko Agenda baten parte izango diren ekitaldi ugari antolatu dira, besteak beste, Argentinan, Belgikan, Kanadan, Txilen, Kolonbian, Espainian, Estatu Batuetan, Frantzian, Perun, Erresuma Batuan eta Uruguain.

Iturria: Irekia

PARTEKATU

INTERESATU ZAITEZ