Urkullu Lehendakariak René Cassin 2019 saria eman dio Federico Mayor Zaragozari, Bakeari, Hezkuntzari eta Giza Eskubideei eginiko ekarpenagatik

Epaimahaiak nabarmendu du saridunak “une zailenetan” Euskadirekin erakutsi duen “hurbiltasun berezia”
Urkullu Lehendakariak René Cassin 2019 saria eman dio Federico Mayor Zaragozari, Bakeari, Hezkuntzari eta Giza Eskubideei eginiko ekarpenagatik
10 Abendua | Eusko Jaurlaritza

Iñigo Urkullu Lehendakariak Giza Eskubideen René Cassin 2019 saria eman dio Federico Mayor Zaragozari, Giza Eskubideen Nazioarte Eguna denean, Bakeari, Hezkuntzari eta Giza Eskubideei eginiko ekarpenagatik.

Sariak Giza Eskubide, Bizikidetza eta Lankidetzaren Idazkaritza Nagusiak banatzen ditu, eta banaketa-ekitaldia Lehendakaritzan izan da; bertan, Josu Erkoreka, Arantxa Tapia, Iñaki Arriola, Cristina Uriarte, Sonia Pérez, Bingen Zupiria, Estefanía Beltrán de Heredia eta Mª Jesús San José sailburuak izan dira, bai eta Jonan Fernández Giza Eskubide, Bizikidetza eta Lankidetzaren idazkari nagusia eta Monika Hernando Biktimen eta Giza Eskubideen zuzendaria ere. 

Eusko Jaurlaritzak aurten eman duen René Cassin saria banatzeko ekitaldian, Lehendakariak nabarmendu du Federico Mayor Zaragozaren ibilbideak, karismak eta hitzak Justiziaren eta Bakearen aldeko gizarte- eta politika-konpromisoa erakusten dutela, bai eta eredugarritasun-maila altua ere. Konpromiso horrek Giza Eskubideen eta Bizikidetzaren arloetako bidegabekeria eta atzerapausoen aurrean erantzutera bultzatzen du.Hori horrela, Lehendakariak nabarmendu du Mayor Zaragozaren ahotsa joera neo-totalitarioen aurrean altxatu eta entzuten dela, muturreko eskuinaren edo aldebakartasunaren gorakadaren aurrean. “Elkartasunik ezaren, bazterketaren eta desberdintasunaren aurrean eta klima-larritasunaren egoeran dagoen pasibotasunaren aurrean baimendutako ahotsa da”, esan du.

Era berean, Lehendakariak nabarmendu du, nahiz eta Federico Mayor Zaragozak nazioarteko harremanen konferentzian parte hartu duen, horrek sekula ez diola ahantzarazi gizartearen oinarrian ekimenik xumeenak bultzatzen. “Beti egin izan du aldez aurretiko jarrerarik onenarekin, eta, horretarako, justiziak, bizikidetzak, giza eskubideek eta bakeak eragindako kezka suspertu du. Beti defendatu izan ditu, uste eta dedikazio osoz, Giza Eskubideen Aldarrikapen Unibertsalaren printzipio eta balioak”, esan du.

Federico Mayor Zaragozaren hautagaitza UNESCO Etxeak proposatu du. Oraingoan, epaimahaiak Mayor Zaragozak Bakeari, Hezkuntzari eta Giza Eskubideei eginiko “ekarpen oso garrantzitsuak” nabarmendu ditu, bai eta “bere lanak eta irakaspenak maila globalean eta toki-mailan izandako eragina” ere. Epaimahaiak, gainera, Federico Mayor Zaragozak “une zailenetan” Euskadirekin erakutsi duen “hurbiltasun berezia” balioetsi du; bere izena, laguntza, aholkularitza eta harremanak prest agertu zituen “hainbat eta hainbat ekimenetarako, gure herrialdean bakea eta adiskidetzea bilatzeko”.

René Cassin sariduna: Federico Mayor Zaragoza

Eusko Jaurlaritzak 2019ko René Cassin saria Federico Mayor Zaragoza 1987aren eta 1999aren artean UNESCOko zuzendari nagusi izan zenari eman dio. Buru izan da, NBEko idazkari nagusiak eskatuta, Zibilizazioen Aliantzan, eta Heriotza Zigorraren aurkako Nazioarteko Batzordeko buru ere izan da. Cultura de Paz fundazioko eta DEMOSPAZ Giza Eskubideen, Demokraziaren, Bakearen Kulturaren eta Indarkeriarik Ezaren Institutuko sortzaile eta presidente izan da.

René Cassin saria

René Cassin saria Eusko Jaurlaritzak sortu zuen, beren jarduketaren bidez gure gizartean giza eskubideen balioak sustatzen laguntzen duten pertsona fisiko edo juridikoen lana jendaurrean aintzatesteko. Sariak René Cassinen izena hartu zuen. René Cassin 1887an Baionan jaio zen, eta Giza Eskubideen Aldarrikapen Unibertsalaren inspiratzaile nagusitzat hartzen da. 1968an Bakearen Nobel Saria jaso zuen.

Iturria: Irekia

PARTEKATU