Ikus-entzunezko Lege berriak euskal eskumenak urratzen dituela ohartarazi dio EAJ-PNVk Espainiako Gobernuari

Joseba Diez Antxustegik azaldu duenez, jeltzaleek aurreproiektua aldatzeko eskatu dute, "Hizkuntza eta kultura eskubideak ez daitezen zapaldu"

Ikus-entzunezko Lege berriak euskal eskumenak urratzen dituela ohartarazi dio EAJ-PNVk Espainiako Gobernuari 14Urria 14 |
Eusko Legebiltzarra
IKUSI BIDEOA

PARTEKATU

EAJ-PNVk Ikus-entzunezko Komunikazioaren Legea aldatzeko eskatu dio Espainiako Gobernuari, haren idazkerak EAEko eskumen-esparrua eta Estatuko hizkuntza ofizial guztiak errespeta ditzan. Joseba Diez Antxustegi legebiltzarkideak adierazi duenez, "Gaur egun ezagutzen dugunak kezkatu egiten gaitu" gure herriari, kulturari eta hizkuntzari eragiten dielako. "Legearen fase goiztiar batean gauden arren, ezagutzen ari garena ez zaigu bereziki gustatzen. Lehenik eta behin, ez duelako errespetatzen Euskadik komunikabideen eta ikus-entzunezkoen arloan duen eskumen-eremua. Eta bigarrenik, hizkuntza eta kultura aniztasunarekiko sentsibilitate falta ikusten dugulako", adierazi du.

Gaurko osoko bilkuran, ordezkari jeltzaleak Pedro Sanchezi ohartarazi dio, araua onartzeko unean, Herri honetako hizkuntza, kultura eta nazio eskubideak arriskuan badaude, sendoak izango direla. "Sendoak izango gara. Euzko Abertzaleak taldea izango da Legebiltzarrean. Eusko Jaurlaritza izango da. Eta ziur gaude Madrilgo Euskal Taldea ere izango dela. Gure eskubideak arriskuan badaude, gure autogobernua defendatzeko bermea izango gara". Nolanahi ere, gertakariak aurreratu nahi ez dituela eta Kultura eta Kirol ministerioak emango dituen pausoak ezagutu arte itxaron nahi duela esan du. Izan ere, legeari izapide luze bat geratzen zaio Legebiltzarrean, eta Gobernuak hori baliatu beharko du jarrerak hurbiltzeko.

"Etapa asko geratzen dira, ez baikara lege-proiektu bati buruz hitz egiten ari. Gainera, Miquel Iceta ministroaren adierazpenek testuan aldaketak egon daitezkeela erakusten dute". Hori horrela, jeltzaleen ordezkariak elkarrizketa eskaini du gai konplexua eta aldakorra negoziatzeko. "Beti izango da hobea lankidetzan aritzea aurrez aurre jartzea baino, azkenean onartuko den testua testu hobea izan dadin. Baina noizbait salatu behar badugu, salatu egingo dugu. Adi egongo gara", esan du.

Diez Antxustegik ikus-entzunezko komunikazioen errealitate oso aldakorra egokitzea beharrekoa dela onartu du. Esparru konplexua da, oso teknikoa, eta erregulazioa etengabe egokitu behar da. Adibide gisa, plataforma digitalen garapena aipatu du, orain arte erabat ezezaguna zitzaigun panorama berri bat utzi baitigute. "Gure edukiak kontsumitzeko modua erabat aldatu da. Orain denetarako sarbidea dugu, non gauden eta zer gailutatik egiten dugun kontuan hartu gabe. Kontsumoa askoz azkarrago, malguago eta erosoago bihurtu da". Errealitate hori, ez ona ez txarra, arautu egin behar da, baina errespetuz.

Interesatu Zaitez