EAJ-PNVk Euskadiko Gobernu koalizioa aldarrikatu du, populismoaren eta ziurgabetasunaren aurrean moderazioaren eta egonkortasunaren babesleku gisa

Joseba Díez Antxustegi EAJ-PNVren Eusko Legebiltzarreko bozeramaileak Euskadiko Gobernu koalizioa aldarrikatu du, populismoaren aurrean moderazioaren eta egonkortasunaren babesleku gisa eta Europan zein Estatuan ezegonkortasuna eta ziurgabetasuna nagusi diren une politikoaren aurrean. EAJ-PNVren legebiltzar-taldeak Bilbon egindako lan-jardunaldi batean, Imanol Pradales Lehendakaria eta Bakartxo Tejeria Eusko Legebiltzarreko presidentea bertan zirela, Díez Antxustegik azpimarratu du talde jeltzaleak ibilbide-orri argi bat duela, egunero islatzen dena legeak, aurrekontuak eta Eusko Legebiltzarrean ekimenak aurkeztuz.

"Asko baloratzen dugu PSErekin dugun akordioa, ez bakarrik Eusko Jaurlaritzan, baita hiru aldundietan eta udal nagusietan ere, uste baitugu gai askoren gainetik bat dagoela: egonkortasuna. Europan eta Estatuan ezegonkortasuna eta ziurgabetasuna nagusi diren une politiko honetan, Gobernu akordioak Euskadi egonkortasunerako babesleku izatea lortzen du, familientzat, enpresentzat, inbertitu nahi duenarentzat eta industriarentzat moderazio babesleku izatea", ziurtatu du Díez Antxustegik.

Legebiltzar talde jeltzaleak kurtso parlamentario honetan egindako lana aztertu eta hurrengo ikasturteari begira lehentasunak ezartzera bideratu du jardunaldia. Ildo horretan, EAJ-PNVko bozeramaileak azaldu du Euskadiko Gobernu akordio horrek "ibilbide-orri oso argia" markatzen duela, eta legeen, aurrekontuen eta Legebiltzarreko ekimenen bidez islatzen dela. "Aurrera egin dugu gai garrantzitsuetan, hala nola etxebizitzan, segurtasunean, lehiakortasun ekonomikoan, osasunean eta hezkuntzan. Bi aurrekontu ditugu onartuta, Etxebizitza Legea dugu eta Basque Segurtasun Foroa bezalako prozesuak garatu ditugu, egunotan fase erabakigarrian sartzen ari dena", nabarmendu du bozeramaile jeltzaleak.

Díez Antxustegik adierazi duenez, EAJ-PNVren talde parlamentarioak norabide horretan jarraituko du lanean, eta Osakidetza, hezkuntza-sistema eta familia-politikak funtsezko elementu gisa indartzen jarraituko duela berretsi du, baita industria-defentsarako ekimenak edo etxebizitzarako sarbidea bermatzeko ekimenak ere.

"Ezerk eta inork ez gaitu desbideratuko gure bide-orritik. Hurrengo aurrekontuak bermatuta ditugu. Eta burokrazia murrizteko eta Euskadik proiektu estrategikoak garatzeko erakargarri izaten jarraitu dezan, administrazioa bizkortzeko eta sinplifikatzeko Legea izapidetu eta onartu nahi dugu datorren ikasturte politikoan. Talde politikoei lege hau babesteko eskatzen diegu, uste dugulako bat gatozela burokrazia murriztu behar dela eta bizitza pixka bat errazagoa egin behar zaiola horrelako proiektuak garatzeko", amaitu du.