Lege-eskumenak dituzten Europako Eskualdeen Ekimenaren (RLEG) gobernuek gaitasun handiagoa eskatzen dute EBko politiketan eragiteko eta laguntzeko

Iñigo Urkullu Lehendakariaren gidaritzapean, RLEG ekimeneko kide diren lege-eskumenak dituzten eskualdeak gaur goizean bildu dira goi-mailako elkarrizketa bat izateko, Europaren Etorkizunari buruzko Konferentzian (COFoE) laguntzeko
Lege-eskumenak dituzten Europako Eskualdeen Ekimenaren (RLEG)  gobernuek gaitasun handiagoa eskatzen dute EBko politiketan eragiteko eta laguntzeko
21
Urtarrila
Eusko Jaurlaritza
PARTEKATU
21 Urtarrila | Eusko Jaurlaritza

Topaketa Eusko Jaurlaritzak eta RLEG ekimenak antolatu dute, eta Europako Politika Zentroaren (EPC) laguntza izan du. Zentro horrek txosten bat aurkeztu du, botere legegilea duten eskualdeek EBko politiketan eragiteko eta horiek ezartzeko duten gaitasuna eta zuzendaritza aztertzeko. 

Lehendakariaz gain, honako hauek ere parte hartu dute bileran: Kataluniako Generalitateko presidente Pere Aragonèsek, Balearretako presidente Francina Armengolek, Flandriako presidente Jan Jambonek, Korsikako Parlamentuko presidente Marie-Antoinette Maupertuisek eta Aaland, Harry Jansson uharteetako presidenteordeak. 

Bere hitzaldian, lehendakariak gogorarazi du beharrezkoa dela botere legegileak dituzten eskualdeak eskaeraren buru izatea, EBko ziklo politiko osoan, herritarren intereserako politika eraginkorrak ezartzeko eta haiei forma emateko. Haren iritziz, funtsezkoa da EBren zilegitasun demokratikorako, eragile horiek erabakiak hartzeko prozesuan bete-betean sartzea, gobernantza-eskema eguneratu baten bidez eta Europar Batasuneko lege-eskumenak dituzten eskualdeen konstituzio-botereak erabat errespetatuz. 

Bileran, gainera, Herman Van Rompuy Kontseilu Europarreko presidente emerituak eta Alain Lamassoure Europako Parlamentuko kide ohiak hartu dute parte. Halaber, bideomezu baten bidez parte hartu du Europako Batzordeko presidenteorde Maros Sefcovic-ek eta RLEGeko eskualdeek EBko erabakiak hartzeko prozesuan egiten dituzten ahaleginak hobetzeko duten zeregina babestu du. 

RLEG ekimenak adierazpen politiko bat onartu du – Europako Etorkizunari buruzko Konferentziari egindako ekarpen gisa –. Adierazpen horretan, Erakundearteko Foroa sortzea proposatzen da. Foro horretan, botere legegileak dituzten eskualdeek aholkularitza eta esperientziak partekatu ahal izango dituzte EBko erakundeekin, modu egituratu eta erregularrean. 

Azkenik, adierazpeneko sinatzaileek konpromisoa hartu dute maila politiko gorenean aldizka lankidetzan aritzeko eta biltzeko, eskualdeko beste bazkide batzuekin aliantza estrategikoak ezartzeko gaitasuna, eskala eta aukera berrikusteko, EBren erakunde-esparruan maila anitzeko gobernantza eraginkor bateranzko bultzada estrategiko argi, kohesionatu eta adostua sortzeko helburuarekin.

*RLEG ekimenak legegintza-eskumenak dituzten Europako 16 eskualde biltzen ditu: Aaland uhartea, Austria Beherea, Austria Garaia, Azoreak, Balearrak, Carintia, Euskadi, Katalunia, Flandria, Madeira, Piamonte, Salzburgo, Tirol, Valentzia, Voralberg, eta Korsika behatzaile gisa.

*Iturria: Irekia

PARTEKATU

INTERESATU ZAITEZ