Unibertsitate Legea diseinatzerako orduan Euskadiko esperientzia aintzat hartzera gonbidatu du EAJ-PNVk Espainiako gobernua

Rosa Peral senatariak ohartarazi du autonomietako eskuduntzak errespetatu beharko dituela, eta Unibertsitateetako ministroari iradoki dio EAJ-PNVri entzun diezaiola unibertsitateko prestakuntza dualaren inguruan.
22 Ekaina | Senatua

Rosa Peralek Manuel Castells Unibertsitateen ministroa gonbidatu du Euskal Unibertsitate Sistemaren esperientzia aintzat  hartzera etorkizuneko Estatuko Unibertsitate Legea diseinatzeko oinarri gisa. Senatuan, ministroaren  agerraldian, ordezkari jeltzaleak lehenik  goraipatu du Euskadik unibertsitate-heziketa dualaren diseinuan eta garapenean izan duen esperientzia egiaztatua, gaur egun 15 titulazio dituena eta 2022rako Unibertsitatearen eta Enpresaren arteko Lehen Euskal Estrategian sartuta dagoena, gradu eta graduondoko enplegagarritasunari lotutako zeharkako gaitasunen garapena bultzatzeko helburuarekin. "Horregatik, kasu egitea eta arautzeko orduan gutaz fidatzea espero dugu", gaineratu du.

Senatari jeltzaleak ohartarazi duenez, EAJ-PNVk eskumen autonomikoak errespetatzen direla zainduko du, eta Euskal Herriko Unibertsitateak, Deustuko Unibertsitateak eta Mondragon Unibertsitateak osatutako Euskal Unibertsitate Sistemak, Confebaskekin eta euskal administrazioekin batera, alegazio-txosten bat prestatu dute, unibertsitateko prestakuntza duala arautzen duen artikulua idazteko proposatutako aldaketekin. Horri dagokionez, Peralek berriz ere adierazi du EAJ-PNVren aldarrikapena, unibertsitateko prestakuntza duala egiten dutenentzat lan-kontratu espezifiko bat sortzea ahalbidetzeko, lanbide-heziketa dualerako dagoen bezala.

Bestalde, senatariak gobernu zentralari dei egin dio online irakaskuntzaren benetako kontzepzio baterantz jotzeko, arrazoi batengatik edo besteagatik irakaskuntza presentziala aldi baterako edo behin betiko eskuratu ezin duten pertsonentzat aukera gisa. "Bereizi egin behar dugu larrialdiko irakaskuntza telematiko baterako trantsizio bizkorretik, orain premiagatik egin behar izan dugun bezala; izan ere, horrelako egoeretarako ez ezik, gaixoentzat, irisgarritasun-arazoak dituztenentzat edo ikasketak lanbide- edo kirol-jarduera batekin uztartzen dituztenentzat ere balio behar du, adibidez, eskolara joatea zailtzen diena". Peralek gaineratu duenez, online ikaskuntza euskarri eta formatu askotara egokitu beharko da, edukia ahalik eta eskuragarriena izan dadin ikasleentzat, eta beti irekita egongo da egungo eta etorkizuneko gizarte digitalaren aldaketa teknologikoetara.

Era berean, Unibertsitate Batzordeko bozeramaile jeltzaleak Castells ministroari galdetu dio unibertsitateari buruz duen ikusmoldea eta zuzendaritzaren profesionalizazioaren inguruan duen iritzia. "Errektorea aukeratzeko prozesuak kezkatzen gaitu, eta horrek gero eta zailtasun gehiago ditu Euskadin, katedradunen kopuruak, adinak eta kudeaketa-lanak ibilbide profesionala zigortzen duten eredu endogamiko bat bihurtzen delako. Gainera, askotan zailtasunak izaten dituzte parte hartzen duten kolektiboari eragin diezaioketen erabakiak hartzeko orduan ", azaldu du.

PARTEKATU