Gizarte gaietan euskal eskumen esparrua errespeta dezala exijitu dio Josune Gorospek Pablo Iglesiasi

Espainiako Gobernuko Bigarren Presidenteordearen lehen agerraldian, diputatu jeltzaleak eskatu du mendekotasun gaietarako finantzaketan dagoen defizita aztertzea eta “neurriak” erreklamatu ditu Lagundu Gabeko Atzerritar Adingabeen egoerari heltzeko
13 Otsaila | Kongresua

Josune Gorospek, EAJ-PNVren euskal taldeko diputatuak, Pablo Iglesiasi, Bigarren Presidenteorde eta Giza Eskubideen eta 2030 Agendarako Ministroari, eskatu dio gaur gizarte gaien euskal eskumen esparrua errespeta dezala. Kongresuko izen bereko batzordean Iglesiasek egin duen lehen agerraldiaren kariaz egin du,honek bere sailaren ildo nagusiak azaldu dituenean.

“Euskadikoaren antzeko gutxieneko errenta sistema sustatzen baduzue”, esan du Gorospek Euskadiko Diru Sarrerak Bermatzeko Errenta gogoan, “gure babesa izango duzue baldin eta horrek gure eskuduntza esparruan sartzea ez badakar. Gauza bera esango dugu Gizarte Zerbitzuen Legeaz”, baieztatu du. “Ondoan izango gaituzu pertsonen bizitza kalitatea handitzea dakarren guztirako, baina EAJ aurrez aurre izango duzu gure eskuduntzak zapaltzen badituzu”, berretsi du diputatu jeltzaleak Kongresuko Euskal Taldearen oposizioa gogora ekarriz Podemosek ´25 Legea´ izenarekin hainbat alorretan eskumen inbasioa aurreikusten zuen proposamena aurkeztu zuenean.

Eskumen esparrua alde batera utzita, Gorospek Presidenteordearen sailaren politikaren bi alderdi zehatz aipatu ditu, bere aburuz erabakiak hartu beharra planteatzen dutenak. Alde batetik, diputatu jeltzaleak Iglesiasi azaldu dio desoreka handia dagoela lagundu gabeko adingabeak hartzen dituzten Autonomia Erkidegoen artean. Gorospek azaldu duenez, Euskadi, daukan babes sistemaren ondorioz, toki erakargarria izan ohi da kanpoan uzten dituzten erkidegoekin alderatuta. “Neurriak hartu behar dituzu”, eskatu dio Bigarren Presidenteordeari.

Beste alde batetik, Diputatu jeltzaleak Iglesiasi erreklamatu dio, mendekotasunaren alorrean Estatuak dagokiona bete ez duelako, eskudun diren administrazioek pairatzen duten finantzaketa defizitari hel diezaiola. “Gai honetan neurriak hartzea nahiko genuke”, amaitu du Gorospek.

PARTEKATU