Euzko Alderdi Jeltzalearen Euzkadi Buru Batzarrak, Aldarte elkartearengandik (gay, lesbiana eta transexualen arreta zentroa) jaso du agenda politikoetan lesbianen ikusgarritasuna sustatzeko eta lesbianentzat berdintasuna eta diskriminaziorik eza bermatzeko neurriak sartzea aldezten duen adierazpena, apirilaren 26an Lesbianen Ikusgarritasunaren alde ospatu ohi den Nazioarteko Egunaren kariaz.
26Apirilak Emakumeen homosexualitatea ikusgarri egitea eta normaltzat jotzea da lesbofobia borrokatzeko modurik onena. Ezinbesteko jotzen dugu lesbianismoaren ikusgarritasun sozial eta publikoaren alde lan egitea, geure gain hartzen dugularik aniztasun sexualari eta genero nortasunari buruzko gaiak jorratzen ditugun guztietan lesbianen errealitatea ikusgarri egiteko konpromisoa.
Halaber, garrantzi handikoa ere bada lesbianei zuzenean eragiten dien legeria hobetzeko adostasun zabalak lortzea, pertsona hauen errealitatea aintzat hartzeko eta berdintasunaren kontrako egoerak saihesten saiatzeko; edozein kasutan, kontrajarriak izan daitezkeen eta babes bereziak merezi duten interesak zainduz.
Horregatik guztiagatik, EAJ-PNV lerro hauen bidez adierazten du bat egiten duela jasotako agiriarekin eta WEB gunean eta gizarte sareetan argitaratzea onesten duela.
Bilbon, 2016ko apirilaren 26an
