Joseba Egibar GBBko presidenteak ezinbesteko jotzen du "Gipuzkoan goitik beherako aldaketa eragitea". Herrialdeak aurrera egitea lortu du " Bilduren aldetik blokeoa eta inposaketa eragin den arren". " Gizartea kontrolatzeko beharra da ezker abertzalearen diseinu politikoaren oinarria" salatu du.
GBBko presidente eta EAJ-PNVren Legebiltzarreko bozeramaileak, Joseba Egibarrek, estatus politiko berri baten aldeko apustua egin du. Eta Autogobernuaren Ponentzian hori aldarrikatuko duela aurreratu du, alegia, Euskadiren izaera nazionalaren eta bere erabakitzeko eskubidearen aitortza, eta eskubide hori nola gauzatu adostea. Bestalde, Gipuzkoak aldaketa sakona behar duela ohartarazi du. Izan ere, ezker abertzaleak kudeaketa txarra egin du; bere interesak gipuzkoarrenekin nahastu dituelako, eta gizartearen kontrolarekin itsututa dagoelako. “Gizartea kontrolatzeko behar hori bere diseinu politikoan dago, hain zuzen ere, hegemonia lortzeko bere helburu horretan”, deitoratu du.
